Откако од вчера наутро ја затвори границата за влез на српски државјани, Грција донесе одлука и за вонредна забрана на летови од Белград до 15 јули во 23:59 часот, јави МИА од Атина.
Исклучок од забраната се членови на семејствата на државјани на ЕУ, граѓани од шенген-зоната, патувања од есенцијални причини, здравствен персонал, научен персонал, државјани на трети земји кои имаат дозвола за долг престој во европска земја, студенти, транзит летови, владин, дипломатски, воен, хуманитарен персонал и сл.
Во однос на образецот „Passenger Locator Form“ (PLF) задолжителен за сите посетители на Грција, од Агенцијата за цивилно воздухопловство соопштуваат дека од 9 јули патниците од меѓународните летови, ќе треба да го пополнат 24 часа пред чекирањето, а не 48 часа како што беше досега.
Ваквите одлуки на Грција следуваат поради влошувањето на епидемиолошката состојба во Србија и поради тоа што голем број од српските туристи на тестирањата по случаен избор при влез во Грција биле позитивни.