Во Србија е прогласена вонредна состојба во 16 града и општини поради влошување на епидемиолошката состојба.
Вонредната состојбата, која подразбира преземање посебни мерки за да се спречи ширењето на новиот коронавирус, е во сила во Белград, Богатиќ, Владичин Хан, Лучани, Нови Пазар, Тутин, Крагуевац, Врање, Ивањица, Шабац, Чачак, Кралево, Ариље, Пожега, Ужице и Прибој.
Во Србија во последните 24 часа се потврдени 289 нови случаи на коронавирус, врз основа на 7 872 тестирани примероци. Во истиот период починале уште шест лица, на респираторни машини се приклучени 93 лица.
Поради ваквата епидемиолошка состојба, но и поради тоа што голем број српски туристи биле позитивни на ковид-19 на тестирањата по случаен избор во Грција, од вчера стапи одлуката на Атина да ја затвори границата за српските државјани.
Комисијата за заразни болести чека информации од здравствените власти во Србија и Косово за епидемиолошката ситуација во двете земји, по што би излегле со евентуални препораки во однос на тоа дали ќе се затвори нашата северна граница.