Тоа е речиси двојно зголемување од претходно
Зголемување на казната за прекршување на мерките за спречување на ширењето на коронавирусот од 300 на 500 евра, најави грчкиот премиер Кирјакос Мицотакис во парламентот.
„Казната за прекршувачите, за оние што свесно инсистираат на прекршување на мерките, ќе се зголеми од 300 евра на 500 за да можеме да ја загрееме економијата, без да го ставиме во опасност здравјето со трет бран на пандемијата“,
рече Мицотакис, пренесе МИА од Атина.
Паралелно со ова, владата е подготвена, доколку постои позитивна препорака од Комисијата на епидемиолози, од понеделник да се отворат продавниците во земјата.
„Секое отворање на економската активност носи ризик од зголемување на случаите. Сè додека ова зголемување на случаите е логично и контролирано и сè додека не врши притисок врз здравствениот систем, тоа е нешто што можеме да го издржиме. Ова е тој тежок баланс што треба да го постигнеме. Ако експертите проценат дека овој ризик е разумен и ни препорачаат дека треба да одиме на постепено отворање на малопродажбата, подготвени сме тоа да го спроведеме од понеделник“,
објасни грчкиот премиер.
Од парламентот соопшти за продолжување на две мерки за поддршка на општеството. Едната се однесува на 80 отсто покриеност на трошоците за кирија за деловен простор, што ќе важи и за февруари, а другата е за надоместокот за невработените што ќе го добијат и во следните два месеци.