„Водачот на главната опозициска партија во Северна Македонија изјави дека доколку биде избран за премиер земјата ќе ја нарекува единствено како ‘Македонија‘, без оглед на договорот од Преспа од 2018 година со кој се реши спорот со Грција за името на земјата“, пишува грчкиот весник, кој важи за близок до владејачката Нова демократија на премиерот Киријакос Мицотакис
Изборната кампања за претстојните претседателски избори во земјава предизвика интерес во грчката јавност, пред сè, поради дел од изјавите на лидерот на ВМРО-ДПМНЕ, Христијан Мицкоски, за Преспанскиот договор и името на државава. Грчкиот весник „Катимерини“ посвети текст за еден сегмент од дуелот меѓу Мицкоски и лидерот на СДСМ, Димитар Ковачевски, кој пред два дена се случи на ТВ Канал 5.
„Водачот на главната опозициска партија во Северна Македонија изјави дека доколку биде избран за премиер земјата ќе ја нарекува единствено како ‘Македонија‘, без оглед на договорот од Преспа од 2018 година со кој се реши спорот со Грција за името на земјата“,
пишува „Катимерини“.
Според грчкиот весник, за време на телевизиската дебата во пресрет на парламентарните избори што се очекуваат на 8 мај, Димитар Ковачевски, лидер на владејачкиот Социјалдемократски сојуз (СДСМ), изрази загриженост за одбивањето на лидерот на десничарската партија ВМРО-ДПМНЕ, Христијан Мицкоски, да го користи уставното име на земјата.
„Ковачевски рече дека ова одбивање може да предизвика проблеми со договорот од Преспа од 2018 година со кој, со поддршка на ООН, името на поранешната југословенска Република Македонија се смени во Северна Македонија“,
пренесува грчкиот медиум.
„За мене, Македонија е и ќе остане Македонија. Моите предци би биле горди на мене за она што го правам за мојот народ и мојата земја“,
го цитира „Катимерини“ лидерот на ВМРО-ДПМНЕ.
Како што пишува грчкиот медиум, неодамнешните анкети укажуваат на водство на ВМРО-ДПМНЕ на претстојните парламентарни избори, кои се совпаѓаат со втората рунда на претседателските избори во земјата, каде што сегашниот претседател и кандидат за СДСМ, Стево Пендаровски, се очекува да се соочи со Гордана Силјановска-Давкова од ВМРО-ДПМНЕ.
Инаку, во телевизиската дебата, зборувајќи за европската перспектива на државата, Ковачевски рече дека ставовите на Мицкоски за уставното име на државата во иднина може да предизвикаат проблеми со Преспанскиот договор поради неговото инсистирање да не се користи уставното име. Мицкоски рече дека името на државата за него секогаш ќе остане само Македонија. Така тој одговори и на прашањето како ќе ја именува државата, дома и надвор доколку стане премиер.
„За мене Македонија е и ќе биде Македонија. Тука нема дилеми. Моите предци ќе бидат горди на мене, на тоа што го правам за својот народ и за својата држава. Тука нема осцилации. Не ги менувам ставовите”,
рече Мицкоски.
Ковачевски на ова возврати дека Мицкоски не може да ги менува ставовите, зашто тој воопшто нема став.
„Кога немате став, вие не можете да го менувате. Тоа е неговата предност. Кога имате став, тогаш носите одлуки. Преспанскиот договор е резултат на работа 30 години, за тоа време ние имавме посредник адвокат од САД. Договорот не го постигна Метју Нимиц. Договорот го постигнаа двајца лидери кои постигнаа договор и си пружија рака и ги решија односите меѓу двете држави. Тоа е лидерство. Останавме Македонци и македонскиот јазик е македонски и станавме членка на НАТО“,
рече Ковачевски.
Според Мицкоски, тоа што некој го направил не е лидерство туку отворање на Пандорината кутија.
„Тие прашања се решаваат стратешки. Тоа што се направи во Преспа беше на маса и во времето на Глигоров и во времето на Црвенковски, Георгиевски, Хари Костов, Бучковски и во времето на Груевски. Немојте да мислите дека тие немале таква можност. Имало причина зошто тие тоа не го направиле. Тоа имплицираше вето од Бугарија и затоа го потпишавте францускиот предлог. И затоа денеска сме заглавени. Требаше да учиме од историските грешки на македонските политичари. Владите ги исполнувале сите критериуми, политичкиот момент беше проблем. Чекор по чекор се доведовме во оваа ситуација. Нема да дозволам дополнителни национални понижувања кои вие ги прифативте. Да ви е јасно“,
рече Мицкоски.
Инаку, пред еден месец Тимчо Муцунски, потпретседател на ВМРО-ДПМНЕ, во интервју за емисијата „360 степени“ на МТР1, на прашање дали доколку во иднина стане министер или зборува од име на Владата би го користел новото уставно име, рече дека има обврска да го почитува Уставот, но дека истовремено нема сила која би го натерала да го користи тоа име.
„Јас сум правник и колку некогаш и да не ми се допаѓа правната реалност, имам обврска да го почитувам Уставот и да ги почитувам законите, но истовремено, нема таква сила којашто ќе ме натера, кога говорам, да го користам тоа име“,
рече Муцунски.