„Јас сум правник и колку некогаш и да не ми се допаѓа правната реалност, имам обврска да го почитувам Уставот и да ги почитувам законите, но истовремено, нема таква сила којашто ќе ме натера, кога говорам, да го користам тоа име“, вели потпретседателот на ВМРО-ДПМНЕ на прашањето – дали утре од претпоставена позиција на министер во Владата реторички ќе го користи новото уставно име
360°: Како одговарате на критиките за тоа дека од партија којашто велеше – ќе го вратиме старото уставното име, сега сте партија што прави сè за да го забрза и олесни процесот на замена на личните документи со новото уставно име Република Северна Македонија?
Муцунски: Одговарам дека сме партија којашто работи во интерес на граѓаните и гледаме дека нашите граѓани во моментот се соочуват со сериозни предизвици, коишто се резултат на лошо антиципирање на обврските што оваа влада самата таа ги има преземено од пред повеќе години и колку што е тоа вина на претходното раководство на Министерството за внатрешни работи, јас би рекол дека е еднаква вина и на актуелното раководство на Министерството за надворешни работи што немале зрелост да видат што се случува и сега гледаме како студенти не можат да одат на студии надвор од државата, а веќе се запишани на универзитети…
360°: Значи, нема враќање на старото уставно име!?
Муцунски: Јас велам дека ние треба да работиме за решавање на интересите на граѓаните коишто ги имаат во овој момент.
360°: Јас мислам дека грубо може да се препознае како ќе се поставите кон темата Преспански договор, иако е неспорно дека веќе потпишувате документи со Република Северна Македонија.
Муцунски: И тоа не сме го негирале.
360°: И не сте го негирале.
Муцунски: Патем и тие субјекти, како што, на пример, имаме сега често политички субјекти кои велат – утре ќе се врати името и тие субјекти гледате како и нивни функционери и нивни раководители живеат со правната реалност којашто несомнено ја има во оваа држава.
360°: Големото прашање што ќе правите реторички – дали ќе почнете да го користите новото уставно име бидејќи утре од позиција на премиер, на министер, на пратеник ќе биде очекувано и претпоставено да се користи новото уставно име. И ако не го користите, дали тоа може да биде повод за и Грција да стави рампа?
Муцунски: Јас, искрено да ви кажам, сметам дека Грција треба да остане како што е долги години, стратешки партнер на нашата држава од регионот. Дури и во моменти кога не бил решен проблемот со името, надворешната трговска релација со Грција била сосема добра и значајна и за нашата економија и за грчката економија и сметам дека Грција е еден од тие соседи со коишто ќе мора во иднина да соработуваме не само заради географската близина, туку и заради меѓусебната економска, научна и културна соработка. Во однос на тоа кое име ќе се користи, за мене лично немам никаков сомнеж дека во колоквијална употреба никаде во Преспанскиот договор не е регулирано дека јас треба да го користам тоа име.
360°: Ако утре стоите пред пано со уставното име и држите прес од името на Владата, потенцијално како министер, еве да речам, моето прашање е тогаш дали ќе го користите новото уставно име? Тоа ќе биде очекувањето на Грција.
Муцунски: Јас сум правник и колку некогаш и да не ми се допаѓа правната реалност, имам обврска да го почитувам Уставот и да ги почитувам законите, но истовремено, нема таква сила којашто ќе ме натера, кога говорам, да го користам тоа име.
360°: Тоа може да биде вовед во ново вето од Грција.
Муцунски: Мислам дека ако водиме проактивна и добра дипломатија и ако одиме кон строго почитување на тие обврски коишто патем, да бидеме искрени, Грција не ги почитува, мислам дека македонската надворешна политика може да се движи во посакувана динамика, посакувана во интерес на остварување на желбите и аспирациите на нашите граѓани.