Ѓуриќ упатува и повик до полицијата што побрзо да ги открие напаѓачите на студентите, а правосудните органи да ги казнат согласно законот
Градоначалникот на Нови Сад, Милан Ѓуриќ попладнево поднесе неотповиклива оставка од функцијата, пренесува новосадскиот медиум „НС уживо“.
Тој поднесе оставка по синоќешниот напад врз студентите во Нови Сад, во кој неколкумина беа повредени.
Во оставката што ја пренесува медиумот, Ѓуриќ пишува дека ова не е израз на слабост или повлекување пред предизвиците, туку чин на преземање одговорност и отворање простор за обнова на довербата кај граѓаните.
„Оваа одлука е израз на мојата длабока почит кон граѓаните на Нови Сад и мојата верба во демократските процеси и моето верување дека на овој начин ќе придонесам за смирување на тензиите и создавање простор за конструктивен дијалог и продолжување на проектите за натамошно подобрување на животот на сите жители на Нови Сад“,
пишува Ѓуриќ.
Според Ѓуриќ, стабилноста и смирувањето на тензиите и запирање на понатамошните поделби во општеството се клучни услови за натамошен напредок и развој на Нови Сад и подобрување на животот на граѓаните.
„Како некој кој верува во моќта на дијалогот и меѓусебното разбирање, сметам дека прифаќањето одговорност е и поднесувањето оставка, моја човечка и политичка обврска и морална должност“,
додава тој.
Ѓуриќ упатува и повик до полицијата што побрзо да ги открие напаѓачите на студентите, а правосудните органи да ги казнат согласно законот.
По синоќешниот напад врз студентите во Нови Сад, во кој неколкумина беа повредени, денеска оставка поднесе и премиерот Милош Вучевиќ.
Вучевиќ додаде дека утринава имал долг и значаен разговор со српскиот претседател Александар Вучиќ, кој ја прифатил неговата одлука да поднесе оставка од функцијата.
Оставката на Вучевиќ, а со тоа и на целата влада, доаѓа откако претседателот Александар Вучиќ вчера најави дека ќе побара најитна и најмасовна реконструкција на владата на Србија.
За време на синоќешните блокади во Нови Сад, како што објавија студентските организации на социјалните мрежи, група студенти биле нападнати од непознати лица.
Во инстаграм-објавата, студентите наведуваат дека четворица мажи со бејзбол-палки бркале група студенти кои ставале налепници и пишувале пароли низ Нови Сад. Инцидентот започнал пред просториите на владејачката Српска напредна странка (СНС), каде што студент и студентка на Медицинскиот факултет во Нови Сад залепиле налепница на корпа за отпадоци. Од просториите на партијата во тој момент излегле двајца мажи.