На својот фејсбук-профил Стефковски објави дека утрово од Полициската станица Гази Баба побарал зголемено полициско присуство во критичниот период на полициски службеници во самите автобуси на ЈСП Скопје и најавува состаноци со месните заедници
Изминатите неколку дена континуирано се случуваат инциденти во автобусите на ЈСП во кои се повредени ученици, деца жители на тој дел од Општина Гази Баба. Ова на својот фејсбук-профил го објави градоначалникот Бобан Стефковски.
„Изминатите неколку денови во континуитет се случуваат инциденти во автобусите на ЈСП кои поминуваат од Ченто, преку Сингелиќ до Стајковци. Во инцидентите се повредени ученици, деца жители на тој дел од Општина Гази Баба. Како градоначалник, а вооедно и претседател на Советот за превенција на Општина Гази Баба закажав седница на Советот за 19.09.2022 година (понеделник) на која се поканети претставници од Месната заедница Сингелиќ и Месната заедница Стајковци, како и претставници од надлежни институции кои по функција се членови на Советот. На таа седница ќе предложам мерки и заклучоци за надминување на состојбата. Вооедно денес одржав средба со претставници на Месната заедница Стајковци на која ги информирав за преземените дејствија од моја страна, а со цел превенција од вакви случувања во следниот период. Утрово испратив допис до Полициската станица од општа надлежност Гази Баба во кој побарав зголемено полициско присуство во критичниот период на полициски службеници во самите автобуси на ЈСП Скопје. Јавно апелирам до младите, но и нивните родители да се разговара и вакви случувања во иднина да не ни се повторуваат. Вооедно апелирам и до Министерството за внатрешни работи да преземе соодветни мерки со цел расчистување на изминатите настани, но што е и најважно превенција од идни вакви и слични немили настани“,
напиша Стефковски во објавата.