Викенд-забраните за движење од 16 до 5 часот нема да важат за земјоделците што одгледуваат раноградинарски култури и имаат неодложни активности поврзани со производство во пластеници.
Како што информираше министерот за земјоделство Трајан Димковски, другите земјоделци од останатите потсектори (сточари, овоштари, полјоделци), ако имаат неодложни активности поврзани со земјоделското производство за време за забраната за движење, треба телефонски да се јават во подрачните единици на Министерството за земјоделство, да образложат и да остават мејл за контакт.
Откако Подрачната единица ќе изврши проверка на доставените податоци, ќе ги препрати до Министерството за земјоделство, а потоа и до Министерството за информатичко општество од каде што земјоделците на својот мејл ќе ја добијат дозволата.
Димковси информираше дека во сила стапува и Уредбата според која – додека трае вонредната состојба, нема да течат роковите за прибирање понуди за давање под закуп државно земјоделско земјиште до три хектари.
„Заради интензивирање на сезоната на земјоделски работи, особено кај градинарските култури, во делот на забраната за движење во викенд-деновите, се исклучуваат земјоделците што одгледуваат раноградинарски култури и имаат неодложни активности поврзани со производство во пластеници. Тоа значи дека оваа категорија земјоделци не треба да вади посебни дозволи. Но, укажуваме, ова исклучување да се искористи исклучиво за вршење на земјоделските активности во пластениците“,
напомена Димковски на прес-конференција.