Град Скопје објави целодневна програма по повод одбележување на 59-годишнината од катастрофалниот земјотрес кој го погоди Скопје во 1963 година на денешен ден. Одбележувањето ќе започне со со положување цвеќе на Споменикот на жртвите од земјотресот на градските гробишта во Бутел, а ќе продолжи со целовечерна програма во рамки на Младинскиот културен центар (МКЦ)
По повод одбележувањето на 59 години од катастрофалниот земјотрес што го погоди Скопје на денешниот датум во 1963 година, Град Скопје преку соопштение истакна дека одбележувањето на овој ден е потсетник за сите нас за трагедијата и за повторното раѓање на Скопје – градот кој во својата долга историја повеќе пати бил жртва на природни катастрофи.
„Секоја година овој датум, 26-ти јули, нè потсетува на катастрофалниот земјотрес во 1963 година, на солидарноста на неговите жители, но и на солидарноста на светот кој сплотено ни помагаше во тие тешки и болни денови. Многу жители ги загубија животите под урнатините на Скопје, а голем број беа повредени“,
стои во соопштението од Град Скопје.
Оттаму додаваат дека традиционално одбележувањето на 59-годишнината од катастрофалниот земјотрес ќе започне со положување цвеќиња во 10 часот на Споменикот на жртвите од земјотресот на градските гробишта во Бутел.
Како дел од настаните со кои ќе се одбележи годишнината од земјотресот, од Град Скопје наведуваат дека вечер во Младинскиот културен центар (МКЦ) со почеток во 20 часот ќе се обрати градоначалничката Данела Арсовска, која ќе ја отвори изложбата „За Скопје со срце од целиот свет“.
Дел од целовечерната програма на МКЦ по повод сеќавање на земјотресот, во 20:30 часот во Кино „Фросина“, ќе биде и проекцијата на филмот „1963: Добра ноќ Скопје“ во режија на Илија Павлов, а во 21:00 часот ќе се одржи Вечерен настан за одбележување.