Со последните 24 тестирања за откривање на новозаразени со коронавирус во гостиварскиот регион, откриени се осум нови случаи, објави МИА повикувајќи се на информациите на меѓуопштинскиот кризен штаб за Гостивар, Врапчиште, Маврово и Ростуше.
Од новоокриените два се во Гостивар, а шест во општина Врапчиште -два во селото Добри Дол и четири во Неготино Полошко.
До денеска на поширокото гостиварско подрачје има дваесет активни случаи (девет во општина Гостивар и 11 во општина Врапчиште). Во најмалубројната општина Маврово и Ростуше изминатава недела нема регистриран заболен и нема активни случаи.
Од почетокот на пандемијата, во гостиварско направени се 438 тестирања, а од нив 41 лице имаа позитивни резултати. Најмногу се во општина Врапчиште 20, во Гостивар 19 и два во Маврово Ростуше. Досега излекувани се 18, меѓу кои има и пет медицински лица.
Од последици на ковид -19 во гостиварско починаа три лица.
Министерството за здравство се уште не ги објави најновите бројки за новозаразени во земјава. Изминатите денови е регисттриран зголемен број случаи поради што во неколку општини е воведен 80-часовен карантин, а во останатите делови дневни реструкции во движењето.