Министерката Јаневска најави дека ќе почнат преговори со универзитетите во државата за следната година да бидат обезбедени поголеми простори – амфитеатри за да може во нив да се спроведува матурата, а дополнително ќе бидат обезбедени со блокатори за да не може да се користат комуникациски уреди
Во јунскиот испитен рок на 268 ученици им била изречена мерката поништување на испитот, а најголем број прекршување на правилата за полагање на државната матура се констатирани во скопското средно училиште „Арсени Јовков“ каде што имало вкупно 32
Годинашната средна оценка на матурата е 3,25, соопшти денеска директорката на Државниот испитен центар (ДИЦ), Билјана Михајловска.
Оваа оценка, во однос на претходните години, е пониска, но според Михајловска е многу пореална.
„Споредено со минатите години, постои намалување (3,67 во 2023 година, 3,78 во 2022 година и 3,61 во 2021 година) кое, според Државниот испитен центар како надлежна институција за спроведување на процесот, е резултат на заострените мерки при полагањето кои овој пат беа преземени. ДИЦ и сите во образованието сметаме дека ова е многу пореална оценка на државната матура. Ваквите различни резултати се и во однос на другите предмети. Средната оценката за мајчин јазик е 3,37, за англиски е 3,06, за француски е 4,47. Она што е важно е дека оценката по мајчин јазик и по англиски јазик сметаме дека оваа година е многу пореална од претходните години“,
рече Михајловска на денешната прес-конференција на која беа презентирани резултатите од полагањето.
Вкупно 14 834 пријавени кандидати на 1 јуни го полагаа задолжителниот екстерен испит по мајчин јазик, додека на 8 јуни се полагаше изборниот предмет, а тестирањето се спроведе во холовите и спортските сали на училиштата, заради поголема прегледност и контрола на набљудувачите над учениците.
Резултатот од ова е, како што кажа Михајловска, што биле откриени 49 ученици кои за време на решавањето на тестовите користеле мобилен телефон, додека четири ученици се фатени како препишуваат решенија по претходно добиени одговори на поставените прашања. При оценувањето на тестовите, оценувачите детектирале 175 ученици кои препишувале на тестовите, како и 22 плагијати. Врз основа на тоа, на 268 ученици на кои им е изречена мерката поништување на испитот ќе можат повторно да полагаат во августовскиот испитен рок.
Како што рече Михајловска, мерката поништување на испитот им е изречена на ученици од 54 училишта. Најголем број прекршување на правилата за полагање на Државната матура се констатирани во скопското средно училиште „Арсени Јовков“ каде што имало вкупно 32, потоа во средното медицинско „Д-р Панче Караѓозов“ каде што се изречени 18 мерки, во тетовското „8 Септември“ имало 14 изречени мерки, а по 13 мерки за прекршување на правилата на тестирањето се изречени во скопското „Методија Митевски – Брицо“ и дебарското „28 Ноевмри“. Во СУГС „Цветан Димов“ во Скопје се изречени 12 мерки за останување од процесот на полагање на државната матура.
Михајловска рече дека учениците што не ја положиле матурата во првиот испитен рок ќе може да се пријават за полагање во август. Од 10 до 18 јули трае пријавувањето за августовскиот испитен рок, а полагањето ќе биде на 12 и 14 август.
„Следната недела, во понеделник и вторник, учениците што не се задоволни од оценката ќе може да поднесат приговори до училиштата кои потоа ќе бидат проследени до ДИЦ и комисиите за разрешување на приговорите. Сите ученици што не приговараат од денеска веќе ќе може да ги добијат дипломите во нивните училишта. Оние што приговараат ќе треба да почекаат до 16 јули за да ги испратиме резултатите по разрешување на приговорите“,
рече Михајловска.
Министерката за образование и наука Весна Јаневска најави дека од следната година ќе има подобрување на процесот на спроведување на матурата.
„Спроведување на матурата во поголем простор даде резултати, па затоа ние најбрзо што може ќе почнеме преговори со универзитетите во државата да ни обезбедат поголеми простори – амфитеатри за да може во нив да се спроведува матурата, дополнително обезбедени со блокатори за децата да не може да ги користат комуникациските уреди. Ќе се повикаме и на одредби од законот, но и на морал и етичност, како од наставниците, тестаторите и набљудувачите“,
рече Јаневска која присуствуваше на прес-конференцијата.
Втората мерка што ја најави Јаневска за од идната година се однесува на измена на правилниците за полагање државна матура, од аспект на подигнување на одговорностите на лицата кои се вклучени во процесот.
„Мора да постојат санкции за набљудувачите, тестаторите и за сите оние што ги делат просториите со учениците што полагаат, а прават пропусти и жаргонски кажано – замижуваат пред некоректни активности од страна на учениците. Ќе направиме максимални напори да обезбедиме бенефит за тестаторите и набљудувачите, но тоа значи тие мора етички и морално да ја спроведуваат својата работа затоа што кога има бенефит има и сериозна одговорност“,
додаде министерката.