Според него, сите земји имаат корист од развој на добрососедските односи во контекст на развивање на економијата, креирањето нови работни места, културата и целото општество
И двете страни, и Северна Македонија и Бугарија, треба да вложат подеднакви напори за развој на добрососедските односи, порача денеска од Битола евроамбасадорот во земјава, Дејвид Гир.
„Потребни се напори и преземање обврски од двете страни, во добра волја за да се развијат овие позитивни односи, и двете страни да направат напори за имплементација на Договорот за добрососедство, тој да се имплементира во добра волја за да имаат корист двете страни“,
рече Гир одговарајќи на новинарско прашање на отворањето на „Јуроп хаус“ во Битола.
Според него, сите земји имаат корист од развој на добрососедските односи во контекст на развивање на економијата, креирањето нови работни места, културата и целото општество.
„Она што е најважно е дека сите страни треба да направат сè што е можно, сè со цел да се креира атмосфера тие односи да бидат попродуктивни и покорисни колку што е можно повеќе“,
рече Гир.
Во контекст на Договорот за стабилизација и асоцијација, кој е првиот договор за односи со ЕУ, и во контекст на пристапните преговори, како што посочи евроамбасадорот, секогаш е од огромна важност да се развиваат добри релации во контекст на добрососедските односи.
„Она што сакаме ние да видиме е оваа земја да биде оценета врз основа на напредокот што ќе го постигне во процесот на реформи и сите напори треба да се фокусираат на тоа, на креирање работни места, развој на енергетскиот сектор, животната средина, владеење на правото, она што директно влијае врз животот на граѓаните“,
заклучи Гир.