Во фокусот на неговото патување ќе биде ЕУ-перспективата на земјите од Западен Балкан, најавија од кабинетот на Шолц
Германскиот канцелар Олаф Шолц следната недела доаѓа во дводневна посета на Западен Балкан, Грција и Бугарија, потврди Берлин, јавува „Дојче Веле“.
Први станици на дводневната балканска турнеја на Олаф Шолц ќе бидат Косово и Србија на 10 јуни. Како што изјавил портпаролот на германскиот канцелар, во Косово Шолц ќе ги посети и германските групи во КФОР.
Од таму, Шолц ќе замине за Солун каде на покана на грчкиот премиер Кирјакос Мицотакис ќе учествува на вечера со претставници на земјите од регионалната иницијатива „Процес за соработка во Југоисточна Европа“.
Наредниот ден, на 11 јуни германскиот канцелар ќе отпатува во Северна Македонија, а потоа и во Бугарија, пренесува „Дојче Веле“.
Според соопштението од кабинетот на Шолц, во фокусот на неговото патување ќе биде ЕУ-перспективата на земјите од Западен Балкан, како и придонесот на Германија во унапредувањето на регионалната соработка и надминувањето на билатералните блокади. Освен тоа, централна тема ќе биде и заедничката реакција на руската агресија врз Украина.
Најавите дека Шолц доаѓа на Западен Балкан и дека веројатно ќе го посети Скопје, германските медиуми ги објавија пред десетина дена, а во понеделникот германската амбасадорка во земјава, Анке Холштајн, во интервју за „360 степени“, ја најави посетата на Шолц на Северна Македонија и на Бугарија, како дел од ангажманот на Берлин за деблокада на пристапниот процес за земјава.
Photo: EPA-EFE/CLEMENS BILAN / POOL