Француско-германскиот план за нормализација на односите помеѓу Србија и Косово, според амбасадорот, не предвидува формирање на „Република Српска“ на Косово
Германскиот амбасадор во Косово, Јорн Роде, во изјава за „Радио Косово“ истакна дека Германија е задоволна од позитивниот дијалог помеѓу Косово и Србија во Брисел, каде што двете страни се изјасниле дека се подготвени да го прифатат предлогот од Европската Унија за нормализација на односите.
Тој кажа дека во наредните 10 дена се очекува двете страни да остварат одлучувачки напредок, по што ќе се разјасни механизмот за спроведување на договорот. Роде вели дека предлогот треба да се искористи од двете страни, но и дека Косово мора да покаже подготвеност да разговара за формирање на Заедницата на српски општини која е дел од договорот, бидејќи доколку не се формира, не може да се спроведе договорот.
„Суштината на овој план е да се стави возот во колосек и ако договорот се спроведе, тогаш се приближуваме до целта, бидејќи тоа е фактичко признавање на Косово од страна на Србија“,
вели Роде.
Роде изрази дека очекува двете страни да се придржуваат до ветувањата што ги дале во Брисел, а за спроведување на договорот вели дека постои и временска рамка до кога тој би требало да започне да се остварува.
„Премиерот Курти и претседателот Вучиќ ќе се сретнат на 18 март во Охрид и се надеваме дека тогаш ќе дојде до одлични резултати од двете страни, со што би се разјаснил механизмот за спроведување на договорот. Се надеваме дека до крајот на месецот ќе дојде до приближување на ставовите и дека договорот ќе биде потпишан. Постои временски притисок тоа да се постигне бидејќи имаме геополитичка ситуација со војната во Европа која се чувствува и на политички и на економски план во секоја земја“,
кажа Роде.
Инаку, по новата рунда преговори на релација Белград-Приштина, претседателот на Србија, Александар Вучиќ, во интервју за српскиот јавен радиодифузен сервис кажа дека Србија е подготвена да работи на имплементација на многу работи од европскиот план за нормализација на односите со соседно Косово, но даде една забелешка.
„Веќе им го кажав тоа и на Макрон и на Шолц и на сите големи лидери. Станува збор за тоа дека не можеме да зборуваме за меѓусебно признавање и за влез на Косово во Обединетите нации. Додека сум претседател нема да потпишам формално или неформално признавање на Косово, ниту членство во ОН“,
рече Вучиќ.
По ова, косовскиот премиер Албин Курти го обвини српскиот претседател Александар Вучиќ дека го прекршил европскиот предлог за нормализација на односите меѓу Косово и Србија.
Посочувајќи ја изјавата на Вучиќ, во која тој тврди дека додека е претседател нема да го прифати влезот на Косово во Обединетите нации, Курти нагласи дека се крши членот 4 од европскиот предлог, кој двете страни го прифатија на последната средба во Брисел.
„Претседателот на Србија вети дека ќе се спротивстави на членството на Косово во Обединетите нации. Ова би претставувало јасно прекршување на членот 4 од предлогот на Европската Унија. Нормализирање на односите е можно само ако двете страни преговараат со добра волја. Србија изгледа реши да не го прави тоа“,
напиша Курти во објава на Твитер.