Кристиан Дростен, советник на канцеларката Ангела Меркел, зборува за „превентивен парадокс“, велејќи дека во Германија луѓето гледаат дека болниците не се пребукирани и не разбираат зошто нивните продавници мора да бидат затворени, без да помислат на ситуацијата во Њујорк или Шпанија
Во моментов единиците за интензивна нега во Германија се полупразни, па луѓето мислат дека мерките се прекумерни, вели водечкиот германски вирусолог, Кристиан Дростен, еден од главните советници на германската влада во актуелната криза. Во интервју за британски „Гардијан“ , Дростен вели дека многумина во Германија на него гледаат како на „злобник што ја осакатува економијата“ за што добива и закани по живот, но тој е убеден ден состојбата во земјата е под контрола благодарејќи на рестриктивните мерки.
„Во моментов гледаме полупразни единици за интензивна нега во Германија. Тоа е затоа што почнавме рано со дијагностика на широки основи и ја запревме епидемијата – го донесовме репродукцискиот број под еден. Сега, она што јас го нарекувам ‘превентивен парадокс’ се всади меѓу луѓето. Велат дека сме претерале во реакцијата, има политички и економски притисок за враќање во нормала. Федералниот план е за благо попуштање, но бидејќи германските сојузни држави самите носат мерки, се плашам дека ќе видиме многу креативност во интерпретацијата на планот. Се плашам дека репродукцискиот број повторно ќе почне да се зголемува и ќе имаме втор бран“,
вели Дростен за „Гардијан“.
Тој одговара и на пршањето – што го држи буден ноќе.
„Во Германија луѓето гледаат дека болниците не се пребукирани и не разбираат зошто нивните продавници мора да бидат затворени. Тие гледаат само што се случува овде, а не и ситуацијата, на пример, во Њујорк или Шпанија. Ова е превентивен парадокс и за многумина Германци јас сум злобникот што ја осакатува економијата. Добивам закани по живот, за кои ја известувам полицијата. Многу позагрижувачки за мене се другите и-меилови, од луѓе што велат дека имаат три деца и дека се загрижени за иднината. Не сум јас причината и не е моја грешка, но тие ме држат ноќе буден“,
вели германскиот вирусолог Дростен.