Неколку стотици полицајци биле ангажирани за да ги отстранат тристотината активисти што протестираа против одлуката за проширување на рудникот на јаглен во областа во близина на Менхенгладбах, во протестите што почнаа во средата
Германската полиција соопшти дека ги отстранила речиси сите климатски активисти од селото Луцерат, кои од средата протестираа против уривањето на населбата заради проширување на ископот на јаглен на таа локација.
Неколку стотици полицајци биле ангажирани за да ги отстранат тристотината активисти што протестираа против одлуката за проширување на рудникот на јаглен во областа во близина на Менхенгладбах, во протестите што почнаа во средата.
Двајца учесници на протестот сè уште не се откажуваат, а се скриени во подземен тунел кај Луцерат, додаваат од полицијата.
„Во селото Луцерат повеќе нема активисти“,
соопшти локалната полиција.
Оттаму додаваат дека се отстранети и 35 дрвени куќички и 30 дрвени конструкции во кои привремено престојувале активистите.
Активистите за спречување на климатските промени сметаат дека селото и другите објекти во околината не треба да се уништуваат, а рудникот за јаглен под нив да не се проширува.
Тие велат дека согорувањето на јаглен ги поткопува напорите на Германија за намалување на емисиите штетни гасови во атмосферата.
Сопственик на локацијата каде што се наоѓа селото е енергетската компанија РВЕ, а последниот жител од населбата се иселил пред една година.
Германија најави постепено укинување на јагленот до 2030 година, а потоа го одложи датумот до 2038 година.
Тензиите ескалираа во саботата, кога полицајците употребија водени топови и палки за да ги растераат активистите. Околу 20 демонстранти се повредени во судирите и пренесени во болница, тврди лекар кој е меѓу активистите што се противат на употребата на јаглен за производство на електрична енергија.
Портпаролот на полицијата изјави дека во активностите на терен се повредени околу 70 полицајци, од кои повеќето за време на саботните судири.
Организаторите на протестот тврдат дека во саботата имало околу 35 илјади демонстранти, додека полициските проценки говорат за околу 15 илјади.
Меѓу демонстрантите беше и шведската екоактивистка, Грета Тунберг.