Германија е задоволна како се справува со коронавирусот бидејќи не дозволија да се преоптовари здравствениот систем. Канцеларката Ангела Меркел денеска најави дека од понеделник почнуваат со отворање на дел од продавниците, но мерките многу внимателно ќе ги олабавуваат.
„Тоа што го постигнавме е само етапен успех, кој е многу кревок. Се согласивме дека не треба да има избрзано дејствување. Треба да разбереме дека ќе мора да живееме со овој вирус сè додека не се пронајде лек или вакцина и затоа треба да го обезбедиме она што го постигнавме“,
рече Меркел на прес-конференција.
Таа истакна дека е договорено мерките, како што е задолжително држење растојание во јавност меѓу лица од најмалку 1,5 метри, да останат на сила, како и одредбата со која се забранува движење со повеќе од едно лице кое не е од исто домаќинство. Исто така, рече дека сите прекршувања ќе продолжат да бидат строго казнувани.
Во Германија од 4 мај ќе се отворат училиштата за матурантите и другите завршни одделенија, додека основните училишта и градинките ќе останат затворени.
„Наставата мора да биде организирана во мали групи и мора да биде изграден концепт за паузи, но и за превоз“, појасни Меркел.
Што се однесува до фризерските салони, тие ќе почнат да работат од 4 мај, но со концепт за одржување хигиена.
Во однос на верските заедници, таа им се заблагодари на црквите за поддршката на мерките за време на Велигден и најави дека верските собирања и натаму нема да се одржуваат.