Амбасадата на Германија денеска во Министерството за здравство предаде донација од 84 респираторни машини и 100 пулс оксиметри со вкупна вредност од 878.768 евра, во рамки на поддршката на Германија за земјите од Западен Балкан.
Амбасадата соопшти дека донацијата се реализирала благодарение на одличната соработка меѓу владите на двете земји и во партнерство со канцеларијата на Светската здравствена организација во Скопје.
„Секаде во Европа се справуваме со корона-пандемијата, а притоа европската солидарност е од големо значење. Сè додека не се безбедни сите, не е безбеден никој од нас. Од тие причини, Германија ја поддржува Република Северна Македонија во борбата со корона-пандемијата“,
се вели во соопштението.
Германија денеска донираше и опрема во вредност од 16 илјади евра за Поликлиниката во општина Шуто Оризари.