Денеска се огласи и СЗО нагласувајќи дека советодавниот одбор ги анализира извештаите поврзани со вакцината на „Астра Зенека“, но досега нема докази дека некои здравствени инциденти биле предизвикани од вакцината
Германија и Франција се последните што се приклучија на листата на земји кои превентивно ја прекинаа употребата на вакцината на „Астра Зенека“. Германската влада соопшти дека прекинува со употреба поради појава на случаи на згрутчување на крвта.
Здравствените власти наведуваат дека одлуката ја донеле од претпазливост и по совет на националниот регулатор за вакцини.
Во соопштението се додава дека Европската агенција за лекови ќе донесе одлука дали и како новите информации ќе влијаат на одобрувањето на вакцината.
Франција, пак, соопшти дека ја прекинува вакцинацијата со „Астра Зенека“ на 24 часа, односно во очекување на мислењето на Европската агенција за лекови (ЕМА). Во Франција околу 60 пожарникари во Буш-ди-Рон минатата недела ја примија првата доза на вакцина на „Астра Зенека“. Но тие ја прекинаа вакцинацијата на нивниот персонал против ковид-19 по појавата на несакани ефекти кај еден пожарникар, кој наводно по првата доза бил хоспитализиран со срцева аритмија. Оваа одлука тогаш се однесуваше само на пожарникарите од овој оддел.
Синоќа и Холандија соопшти дека времено поради превенција ја запира употребата на вакцината на „Астра Зенека“, а претходно тоа го направија и Данска, Норвешка, Австрија, Италија, Исланд, Естонија, Литванија, Летонија и Луксембург.
Холандската служба за контрола и надзор на реакција на лекови „Фармаковиксиленс“ досега потврди 10 инциденти кај вакцинирани со „Астра Зенека“. Во соопштението на таа служба се наведува дека несаканите реакции вклучуваат случаи на тромбоза и емболија, но не и намален број тромбоцити – како што имаше случаи во Данска и Норвешка.
Данската здравствена служба, пак, денеска соопшти дека 60-годишна жена, која починала откако примила вакцина „Астра Зенека“, имала исклучително невообичаени симптоми. Таа имала мал број тромбоцити и згрутчување на крвта во големите и малите крвни садови, како и внатрешно крвавење. Неколку слични случаи се потврдени и во Норвешка и во базата на податоци на Европската агенција за лекови за несаканите ефекти, нагласуваат од данската Агенција за лекови.
Компанијата „Астра Зенека“, пак, ги отфрли демантираше дека нејзината вакцината предизвикува згрутчување на крвта и нагласува дека нема причина за загриженост и дека има помалку пријавени случаи на тромбоза кај оние што ја примиле инјекцијата отколку кај општата популација.
Денеска се огласи и Светската здравствена организација (СЗО). Оттаму нагласија дека советодавниот одбор на СЗО ги анализира извештаите поврзани со вакцината на „Астра Зенека“, но досега нема докази дека некои здравствени инциденти биле предизвикани од вакцината.
„Штом СЗО добие целосен увид во настаните, своите наоди и какви било измени во сегашните препораки ќе бидат јавно објавени веднаш“,
изјави портпаролот на СЗО, Кристијан Линдмаер.
Тој додаде дека до денеска нема докази дека инцидентите биле предизвикани од вакцината.
„Важно е кампањата за вакцинација да продолжи, за да можеме да спасуваме животи и да го запреме сериозното ширење на вирусот“,
рече Линдмаер.
Исто така, и од Европската агенција за лекови (ЕМА) минатата недела се огласија во врска со ризиците и порачаа бројот на вакви случаи кај вакцинираните лица не е поголем отколку кај општата популација.
„Придобивките од вакцината ги надминуваат нејзините ризици и може да се даде додека се испитуваат случаи на тромбоемболија“,
рекоа од ЕМА и наведуваат дека имало 30 вакви случаи на пет милиони вакцинирани граѓани во Европа.