Од друга страна, во меѓувреме, Северна Македонија го одби францускиот предлог во ваква форма
Имаме многу малку информации за да донесеме одлука и поради тоа не можам да излезам со став, туку само со експертски предлог, изјави денеска шефицата на бугарската дипломатија Теодора Генчовска на седницата на Комисијата за надворешна политика на парламентот на Бугарија посветена на разгледување на францускиот предлог за деблокада на европскиот пат на Северна Македонија.
Како што јави дописникот на МИА од Софија, на заседанието на Комисијата, кое започна попладнево, покрај Генчовска присуствува и нејзината заменичка Весислава Петрова.
Генчовска пред членовите на Комисијата презентираше извештај од 15 страници за напредокот на преговорите меѓу Бугарија и Северна Македонија.
„Владата на Северна Македонија има интерес да започне преговори со ЕУ. Бугарија е заинтересирана за влез на Северна Македонија во ЕУ. Има четири теми за кои има напредок во билатералните односи од мај“,
рече Генчовска.
Во обраќањето таа посочи и дека пред една недела бугарското Министерство за надворешни работи испратило извештај за свикување на седница на собраниската Комисија, но дека таа никогаш не се одржала.
Во меѓувреме македонскиот премиер Димитар Ковачевски по завршувањето на ЕУ Самитот за Западен Балкан соопшти дека Северна Македонија нема да го прифати францускиот предлог во ваква форма.