Информативно-аналитичкиот портал во Бугаија Епицентар објавува дека на затворената седница на парламентот во врска со позицијата на Бугарија во одно на Северна Македонија, Генчовска им признала на пратениците дека состојбата во надворешната состојба е скандалозна и дека 80 отсто од работите за РСМ ги дознава од Скопје
Бугарија има две надворешни политики – едната на премиерот Петков и неговите советници за надворешна политика (што е во спротивност со законот), а другата на МНР, објави информативно-аналитичкиот портал Епицентар.бг.
Ова, како што се наведува во нивниот напис „Скандал – Генчовска открива: Бугарија има две надворешни политики, едната е на премиерот и на неговите советници“, го изјави министерката за надворешни работи Теодора Генчовска на затворена седница на парламентот, побарана од пратениците во врска со ставот на Бугарија за РСМ и странските извештаи дека премиерот ветил дека Бугарија ќе го укина ветото за Скопје до крајот на јуни.
„Генчовска им призна на пратениците дека ‘состојбата во надворешната политика е скандалозна’. Таа откри дека ‘како министерка за надворешни работи дознава 80 отсто од работите за РСМ од Скопје’. Генчовска од пријатели во нашата соседна земја дознала дека Петков и Ковачевски договориле нова меѓувладина средба. Тоа значи дека зад грбот на коалициските партнери и легитимните државни институции, премиерот Кирил Петков и неговата советничка за надворешна политика Весела Чернева водат надворешна политика на штета на националните интереси“,
објавува Епицентар.бг.
„Бугарија има две надворешни политики, едната е на МНР, другата ја води премиерот и неговите советници за надворешна политика. Во однос на меѓуресорската историска комисија, за жал, охрабрувачките изјави на премиерот Петков се тотално невистинити. Работата што ја направи оваа комисија е НУЛА“,
рече Генчовска, објавува порталот, и на тоа додала:
„Ја продолжуваме промената, продолжуваме да живееме со уверување дека државата е невладина организација“,
им порача Генчовска на вчудоневидените пратеници.
Понатаму на затворената седница, како што пренесува бугарскиот портал, Генчовска рекла дека МНР нема добиено ниту еден меморандум од средбите на премиерот Кирил Петков со претставници на македонската страна, што го смета за уште едно прекршување на законот.
Подоцна, по затворената седница, министерката Генчовска пред медиумите призна дека има сериозни несогласувања меѓу МНР и надворешнополитичкиот тим на премиерот Кирил Петков за прашањето за евроинтеграциите и преговорите со Република Северна Македонија.
Таа рече и дека нема документ меѓу РСМ и Бугарија што е основа за преговори и дека речиси ниту една од другите четири точки од Протоколот 4 + 1 не е спроведена од Скопје. Според Генчовска нема време до крајот на француското претседателство да се отвори Уставот на РСМ за во него да се регистрираат Бугарите како државотворен народ.
„Премиерот никаде не ги кажа овие амбиции, ниту на официјални состаноци, ниту со претставници на членките на ЕУ. Овие амбиции му припаѓаат на неговиот тим, кој го советува за овие прашања“,
рече таа.
Генчовска исто така експлицитно истакна дека не е постигнат договор за прашањето за Северна Македонија со германската министерка за надворешни работи Аналена Бербок, која ја побарала средбата за да види дали има некаков напредок. Генчовска рече дека на средбата бил повторен рамковниот став на Бугарија.
Генчовска, според Епицентар.бг уште рекла дека нема да има официјална втора меѓувладина средба со Северна Македонија.
„Видете, од јануари е изгубено многу време, можеше многу да се направи. Реално, до крајот на француското претседателство со Советот на Европа, се сомневам дека моите колеги од Северна Македонија ќе можат да го отворат и затворат овој процес“,
рече шефицата на дипломатијата, додавајќи дека за политичките прашања тешко е да се каже дека има напредок, додека за секторските политики има.
Генчовска е министерка во бугарската влада по предлог на партијата Има таков народ (ИТН) на Слави Трифонов, кој пред десет дена го обвини премиерот Петков дека сака да го тргне ветото за Северна Македонија без притоа да добие некакви гаранции.
ИТН е еден од четирите коалициски партнери во бугарската влада, а дека има несогласувања помеѓу владините партнери потврдил и копретседателот на Демократска Бугарија, Христо Иванов. Како што пренесуваат бугарските медиуми, тој вели дека очигледно е дека има структурен проблем во коалицијата и за прашањето со Северна Македонија, како и дека не може да има промени на ставот без одлука од Народното собрание.
Премиерот Петков, пак, кој е еден од двајцата предводници на движењето „Промените продолжуваат“, кое освои најмногу гласови на последните парламентарни избори, денеска во врска со Северна Македонија порача дека од бугарска страна тој нема потпишано никаков документ, како и дека неговата влада секогаш се придржува до коалицискиот договор и постојната рамковна позиција на Бугарија за Република Северна Македонија, која беше усвоена во тамошниот парламент.