Пожарот кој денеска ги вознемири жителите на скопски Центар е одамна изгаснат, но случајот засега не е расчистен. Причината е што покрај возилото „Опел Зафира“ кое изгоре целосно на тротоар спроти „Македонска пошта“, оштетени се уште најмалку три автомобили а газдата на „Опелот“ ги избегнал полицајците.
Очевидци: Изгореното возило не е регистрирано
Како што објави А1он.мк, меѓу дел од оштетените возила е на Викторија Стефкова од Скопје, сопственичка на возило БМВ Х5. Според неа, возачот избегал кога видел дека му гори возилото.
„Најсимптоматично е тоа што возачот избега и не сака да преземе одговорност. Го виделе соседите како влегува во канцеларијата на „Уника“, но оттаму не сакаат да дадат податоци за него. Најверојатно го штитат бидејќи е нивни клиент. Од осигурителната компанија каде што е регистриран мојот автомобил БМВ Х5, дознавме дека колата што се запали цела година не е регистрирана. Покрај тоа, ја оставил на тротоар непрописно, згора на се, се крие. Според наши информации во колата имало еден куп празни шишиња од средство за дезинфекција што можеби придонело да избие пожарот. Ние жителите од овој дел на градот сме посебно револтирани затоа што овој дел од тротоарот не е регулиран со паркинг, туку е да го наречам „мртов агол“ и кој стигне тука си паркира, а ние сме заложници во сопствените имоти“,
изјави за А1он.мк оштетената Стефкова.
МВР: Познат е газдата на „Опелот“
Според МВР пак, сопственикот на возилото бил во околните дуќани пред да се запали возилото. Откако се запалило, се оддалечил од местото.
Упатени извори од МВР за „360 степени“ велат дека сопственик на возилото е скопјанец од Чаир чиј идентитет е веќе познат. Бил најден преку дополнителни проверки.
Од полицијата дополнуваат и дека од пожарот не било зафатено само БМВ-то, туку и уште две други возила, „Фиат Панда“ и „Даеву Тико“. Истрагата не е завршена, па и засега не знае дали и какви пријави ќе бидат поднесени против сопственикот на изгореното возило.