Од Клиниката за гинекологија – Скопје информираат за три случаи со родилки од Тетово, Скопје и Струмица чии бебиња починале во периодот од 9 до 13 април
Зголемен е бројот на предвремени породувања во последните седмици, а од 9 до 13 април починале пет предвремено родени бебиња, со екстремно мала родилна тежина и со екстремна незрелост, информираат денеска од Универзитетската клиника за гинекологија и акушерство-Скопје.
Од ГАК апелираат родилките и во периодот на справување со ковид-19 смирено и без паника да се подготвуваат за среќен исход од бременоста. Доколку им треба психолошка поддршка, да се јават на телефонскиот број 078 378 766.
„Бременоста и во нормални околности е проследена со осцилации во емоциите, често е проследена со зголемена чувствителност и вознемиреност, а очекувано е ковид-19 да предизвикува нагласена загриженост кај бремените жени. Поради тоа, не е исклучено психолошката состојба на трудниците да има свое влијание и врз поголемиот број предвремени породувања, во однос на вообичаениот“,
велат од ГАК.
На 6 април, во текот на ноќта, трудница во прва бременост со тројка, спонтано забременета, е итно транспортирана од Тетово на ГАК поради започнато предвремено раѓање. Од ГАК информираат дека станува збор за високоризична бременост и првото бебе од тројката имало изразен интраутерин застој во растот и полихидрамнион. Кај мајката имало уринарна инфекција и покачени лабораториски параметри за инфекцијата. Кај бебињата не била спроведена антенатална кортикостероидна терапија (зреење на белите дробови).
„Пациентката е породена на ГАК со итен царски рез, добиени се многу незрели плодови во исклучително тешка состојба, во 28 гестациска недела (многу мала тежина – 740 грама, 1.340 грама и со отоци и 1.160 грама), со потреба од интубација веднаш по раѓањето (без сопствено дишење), кои беа приклучени на механичка вентилација. Непосредно по раѓањето, сите три бебиња беа згрижени по соодветни протоколи. Но, поради екстремната незрелост, многу малата телесна маса, многу малата гестациска недела, бебињата за цело време беа во критична состојба и нестабилни, поради што и покрај терапијата, починаа во различни денови (на 9, 11 и на 13 април). Родилката е тестирана за ковид-19 и е негативна на коронавирус“,
информираат од ГАК.
На 4 април е родено многу незрело новороденче, со мала родилна маса од 1 820 грама. Мајката од Скопје е породена спонтано во 31. гестациска недела, а бебето веднаш по раѓањето било со знаци на многу тешко дишење поради што било интубирано и приклучено на механичка вентилација. На вториот ден од раѓањето, со ехо било утврдено масивно крвавење во мозок од четврти степен, кое било проследено и со невролошки клинички знаци. И покрај спроведената терапија, новороденото починало на шестиот ден од возраста (на 11 април).
Родилка од Струмица забременета ин витро, со близначка бременост, се породила на ГАК на 9 април.
„Првиот близнак беше породен со екстремна незрелост во 26. гестациска недела и со екстремно мала родилна маса од 790 грама. Вториот близнак беше мртов плод. Родилката има активен хепатит Б, а живородениот близнак, покрај екстремната незрелост, имаше и конатална сепса (вродена тешка бактериска инфекција). Новороденото беше згрижено според сите протоколи кои се применуваат во здравствените установи на вискоразвиените земји, но, за жал, и покрај тоа почина на 12 април“,
велат од ГАК.
Поради смртта на петте предвремено родени бебиња, во време кога земјава е пред очекуваниот врв од ширење на ковид-19, а и поради тоа што клиниката е референтен центар за суспектни и позитивни родилки на коронавирусот, медицинската директорка на ГАК, Викторија Јовановска, побарала стручна помош од епидемиолог, интензивист педијатар и перинатолог кои ќе ја анализираат оваа состојба.
„Засега не постои научен доказ дека трудниците и родилките имаат поголема чувствителност на ковид-19 ниту, пак, дека се во поголем ризик од зараза. Кај родилките и трудниците со ковид-19, дури и при евентуална зараза, не е посериозен текот на болеста во однос на општата популација. Овие категории жени треба да ги преземат истите мерки на претпазливост за избегнување на инфекцијата и да се грижат за себе во согласност со препораките за превенција од ширење на епидемијата кои важат и за секоја возрасна личност“,
велат од ГАК.