Сакаме многу јасно да покажеме пред Северна Македонија дека само кога ќе ги исполни своите обврски што самата се согласи да ги исполни тогаш евроинтеграциите веќе нема да бидат сон, порача бугарската вицепремиерка и шефица на дипломатијата Марија Габриел. На седницата за пратенички прашања, како што пренесува МИА, Габриел истакна дека позицијата на Бугарија кон Северна Македонија е многу јасна – да се исполнат обврските договорени и прифатени во јули 2022 година.
„Бугарија ќе продолжи многу јасно да ја брани својата позиција, да потсетува дека стоиме зад исполнувањето на сите услови поврзани со компромисот од јули 2022 година, јасно да се спротивставиме на обидите за лажни информации и дезинформации дека Бугарија има нови услови, а во меѓувреме јасно да опстојуваме на нашиот јазик, култура и идентитет,“
вели Габриел.
На пратениците таа им порача дека Народното собрание на Бугарија може да продолжи да биде многу корисно, но не е во надлежност на ниту еден законодавно тело да се произнесува за вакви теми.
Прашана за предложената резолуција во американскиот Сенат, септември да се прогласи за Месец на македонско-американското наследство во САД, таа рече дека МНР на Бугарија ќе направи сè тоа да не се случи. Информира дека бугарското МНР уште од првиот момент кога дознало за поднесената резолуција презело активности, амбасадорот и генералниот конзул во Вашингтон веќе разговарале со тимот на сенаторот кој ја предложил резолуцијата. Габриел кажа дека дека процедурата во Сенатот е започната, но оти ќе направат сè што е можно да не биде донесена.