Првиот оглас за избор на директор, за што конкурираа Габер-Дамјановска и судијката Оља Ристова, пропадна, па сега Управниот одбор ќе избира директор преку втор оглас, на кој актуелната директорка вели дека повторно ќе се пријави затоа што смета дека во нејзиниот досегашен четиригодишен мандат дала големи резултати
Актуелната директорка на Академијата за судии и јавни обвинители (АСЈО) „Павел Шатев“, Наташа Габер-Дамјановска, ќе конкурира и на вториот оглас за уште еден четиригодишен мандат, а зошто во првиот обид не ја добила поддршката, како што рече, треба да кажат членовите на Управниот одбор (УО).
Нејзиниот четиригодишен мандат истекува на 1 декември година, а конкурс за директорското место веќе еднаш беше распишан. Не него, покрај актуелната директорка, конкурираше и судијката Оља Ристова. На јавна седница на УО на 30 август, иако беше кажано дека и двете кандидатки ги исполнуваат условите за функцијата, сепак ниту една од нив не го доби потребниот број гласови од членовите на Управниот одбор.
„Лично сметам дека за време на мојот четиригодишен мандат дадов многу и има многу големи резултати. Зошто и како УО не даде поддршка, мислам дека тоа е прашање кое треба ним да им го упатите, а не мене. Јас имав што да покажам како завршени работни задачи, како остварувања. Тие се оние кои треба да кажат зошто е таков нивниот став. Верувам дека во наредните месеци ќе се отвори уште еден конкурс, јас планирам повторно да се јавам и ако имате можност упатете го прашањето до членовите на УО“,
изјави денеска Габер-Дамјановска.
На седницата пред неполн месец, таа доби четири гласа „за“ и пет „воздржани. Судијката Ристова, пак, имаше еден „за“ и осум „воздржани“. За избор на директор потребни се минимум пет гласа „за“ од вкупно девет членови.
Дали оваа Академија може да постигне и да продуцира доволно кадар со оглед на недостатокот од судии и обвинители, актуелната директорка вели дека недостатокот што се јавува се таложел многу години наназад бидејќи АСЈО не стигнала да одговори на потребите, меѓутоа нагласува дека динамиката е промената последните години. Во моментов тече едукацијата на група од 59 кандидати чиј завршен испит ќе биде на крајот на ноември и очекувањата се оти до крајот на годината тие ќе може да стапат на должност како судии и обвинители. Паралелно, се едуцира голема група од 97 лица, а се планира конкурс за уште една таква група.
„Во меѓувреме, паралелно едуцираме голема група од 97 лица која ја почна својата теоретска едукација оваа пролет и сега тие ќе завршат некаде за година и пол сметано од сега. Во меѓувреме, се надеваме дека кон крајот на оваа година ќе се објави нов јавен повик за исто така поголема група на слушатели за да почне тестирањето и да може да одговориме на потребите. Морам да нагласам дека оваа динамика на едукација со волку големи групи досега не била од самото основање на Академијата од 2006 година. Оваа динамика е последните неколку години, за жал во минатото како што растеа потребите за пополнување на испразнетите места во правосудството, академијата не стигаше да одговори на тоа, и затоа сега го имаме тој голем недостаток кој сега се чувствува. Тоа е нешто што порано се таложело и сега го гледаме дека имаме проблем“,
изјави Габер-Дамјановска.
Инаку, АСЈО денеска потпиша меморандум за соработка со Амбасадата на Франција кој ја таргетира животната средина.
„Новиот меморандум за соработка таргетира нови цели, една од главните е заштита на човековата околина и посебно инкриминирачките дејствија кои би резултирале за адресирање на проблемите во заштитата на животната средина. Многубројни едукативни активности се замислени во оваа рамка, но понатаму исто така акцент е даден и на изучувањето на францускиот јазик, како на нашите слушатели во академијата исто така и на кадарот што веќе работи во судовите и обвинителствата. Ова е важно затоа што францускиот јазик е еден од официјалните јазици во ЕУ, многубројни документи постојат на француски и колегите треба да умеат да го употребуваат во однос на тоа што се случува во меѓународни рамки, посебно во европски рамки од правен аспект. И мислам дека тука е големата додадена вредност“,
рече директорката.