Од истите причини денеска и утре во Анкара ќе бидат високиот претставник за надворешна политика на ЕУ, Јосеп Борел и комесарот за управување со кризи, Јанез Ленарчич
Високи функционери од ЕУ денеска заедно со премиерот на Грција Кирјакос Мицотакис ќе ја посетат грчко-турската граница кај Еврос. Според најавите, во делегацијата која ќе пристигне ќе бидат претседателот на Европскиот совет Шар Мишел, претседателката на Европската комисија Урсула фон дер Лајен, претседателот на Европскиот парламент, Давид Сасоли, како и потпретседателот на ЕК, Маргаритис Схинас, премиерот на Хрватска, Андреј Пленкович и хрватскиот вицепремиер и министер за внатрешни работи Давор Божиновиќ.
Посетата следува бидејќи ситуацијата на границата стана прилично тензична откако Турција одлучи да ги отвори границите за мигрантите кои од 2015 се на нејзина територија и се упатуваат кон Европа во знак на револт поради минатонеделниот напад врз нејзините сили во Идлиб, Сирија, при што загинаа повеќе од 30 турски војници.
По влошувањето на состојбата со мигрантите, викендов националниот совет за безбедност на Грција донесе одлука да го подигне нивото на обезбедување на државните граници и од овој момент во следниот еден месец нема да се примаат нови барања за азил. За ова Мицотакис се повикува на членот 78 став 3 од Договорот за функционирање на ЕУ (ТФЕУ).
Според официјалната програма за денешната посета, по пристигнувањето во Александруполи, функционерите со хеликоптер ќе надлетаат над копнената граница со Турција, потоа ќе бидат информирани за ситуацијата од началникот на Генералштабот на грчката армија, по што ќе следи и прес конференција, а неколкучасовната посета ќе ја завршат со вечера приредена од грчкиот премиер.
Во Анкара, пак, денеска и утре ќе престојуваат високиот претставник за надворешна политика на ЕУ, Јосеп Борел и комесарот за управување со кризи, Јанез Ленарчич. Тие ќе разговараат со високи владини претставници, но средба со претседателот Ердоган не е предвидена.
„Борел и Ленарчич овие два дена во Анкара ќе одржат разговори за ескалацијата во североисточната сириска провинција Идлиб и хуманитарните последици за цивилното население на терен како и ситуацијата на сириските бегалци во Турција“,
пишува во официјалното соопштение на ЕУ.
По средбите денес и утре, Борел заминува за Загреб каде што се одржува неформален министерски состанок за надворешни работи, на кој состојбата во Турција и Сирија ќе биде главна точка на дневен ред, додека Ленарчич останува во Турција, каде што ќе ги посети бегалските кампови во Газиантеп.