Ќе бидат потребни „најверојатно 15 или 20 години“ за Украина да ѝ се приклучи на Европската Унија, изјави денеска францускиот министер за европски прашања, Клемент Бон, препорачувајќи Киев во меѓувреме да се приклучи на европската политичка заедница, како што предложи францускиот претседател Емануел Макрон.
„Човек треба да биде искрен. (…) Ако кажеме дека Украина ќе влезе во ЕУ за 6 месеци, година или две, се лажеме. Тоа не е точно. Поверојатно за 15 или 20 години, а тоа е многу долг период. Не сакам да им се продаваат илузии и лаги на Украинците. Ако на Украинците им се каже „Добредојдовте во ЕУ“, но вие не сте ги прочитале ситните букви на дното на договорот, а тоа е за 15 години, мислам ќе разочараме цела генерација Украинци. Во меѓувреме, им должиме на Украинците (…) политички проект во кој можат да влезат“,
изјави Бон за Радио Ј, пренесува Хина.
Бон смета дека Европската политичка заедница, предложена од претседателот Макрон, е „комплементарна на ЕУ“ и „може да понуди политички и конкретен проект на земјите кои не се во срцето на ЕУ и сакаат да се доближат до неа“.
Според него, ова не значи дека вратата е затворена, напротив, рече дека таа е отворена, укажувајќи на придобивките како што се „слободното движење во Европа“ и „делумните придобивки од европскиот буџет за обнова на Украина“ или можеби заедничката енергетска политика.
Инаку, прашањето за проширувањето на ЕУ со Украина, Грузија и Молдавија создава контроверзии и несогласувања во Унијата.