Ако Украина биде жртвувана поради економски причини или политички амбиции, дури и сантиметар од нејзината територија, тоа ќе биде огромен удар не само за украинската нација, туку и за целиот западен свет, порача Дуда во обраќањето пред украинските пратеници
Украинскиот Парламент изгласа продолжување на воената состојба и општа мобилизација за три месеци.
Врховната Рада гласаше за продолжување на воената состојба до 23 август. На ова претходеше поднесување предлог за продолжување од страна на украинскиот претседател Володимир Зеленски.
Воената состојба во Украина беше воведена на 24 февруари, кога започна воената инвазија на Русија против таа земја.
Освен тоа што денеска пратениците гласаа за продолжување на воената состојба, тие беа домаќини и на полскиот претседател Анджеј Дуда кој одржа говор во кој им порача дека само Украина има право да одлучува за својата иднина.
„Имаше загрижувачки изјави во кои се наведува дека Украина треба да ги исполни барањата на (рускиот претседател Владимир) Путин. Само Украина има право да одлучува за својата иднина. Ниту една одлука за вас не може да се донесе без вас“,
им порача Дуда на украинските пратеници.
Според него, меѓународната заедница мора да бара целосно повлекување на Русија од територијата на Украина.
„Ако Украина биде жртвувана поради економски причини или политички амбиции, дури и сантиметар од нејзината територија, тоа ќе биде огромен удар не само за украинската нација, туку и за целиот западен свет“,
истакна Дуда.
Полскиот претседател, исто така, рече дека ништо не може да ја наруши солидарноста меѓу неговата земја и Украина и нагласи дека Полска е силен поддржувач на строги санкции против Русија и на членството на Украина во ЕУ.
Неговиот говор беше проследен со чести аплаузи од страна на украинските парламентарци.