Франција, една од земјите кои се тешко погодени од коронавирусот, од 31 јануари ги затвора своите граници за сите земји надвор ЕУ.
Германија, пак, соопшти дека не е дозволен влез од Велика Британија, Ирска, Португалија, Јужна Африка и Бразил, земји каде се појавија високозаразни мутации. На оваа листа од недела ќе се најдат и Свазиленд и Лесото.
Забраната ќе важи до 17 февруари, а исклучок ќе бидат државјаните и оние со постојан престој во Германија, како и за здравствените работници и патниците во транзит.
Германија неделава успеа да го намали бројот на новозаразени под 20 000, но Агенцијата за контрола на болести денеска ги повика граѓаните строго да ги следат мерките, имајќи ги предвид новите соеви на коронавирусот.
Директорот на институтот „Роберт Кох“, професор Лотар Велер, на прес-конференција во Берлин рече дека токму мутациите на вирусот се причина за големата загриженост на властите.
„Добиваме извештаи за зголемен број инфекции како резултат на нови мутации. Сè уште немаме целосна слика за сите карактеристики на овие варијанти. Сè уште не знаеме дали се поопасни и не е познато дали вакцинираните и пациентите кои поминале ковид-19 имаат имунитет за нив“,
изјави тој.
Минатата недела германската Влада донесе одлука за продолжување на строгите епидемиолошки мерки до 14 февруари.
Училиштата, градинките и сите продавници кои не се неопходни остануваат затворени, носењето заштитни маски е задолжително во јавниот превоз, а компаниите се должни да им овозможат на вработените да работат од дома.
Досега се регистрирани повеќе од 2,19 милиони случаи на заразени во Германија и најмалку 55 752 смртни случаи, што ја прави земјата петта најпогодена од вирусот во Западна Европа, по Велика Британија, Франција, Шпанија и Италија.