Предлагаат при аплицирање за лични документи (пасош, лична карта, возачка дозвола), при пополнување на барањето, да се воведе обврска за доставување и фотографија која ќе се направи исклучиво во лиценцирано фотостудио и на тој начин да се обезбеди некаква егзистенција за нив
Фотостудијата и видеопродукциите за свадби и настани, самостојни вршители на фотографска дејност и правни лица, кои вршат набавка и дистрибуција на добра, се здружија во комора и веќе поднеле барање за средби со претставници на надлежните министерства.
Тие сметаат дека се колатерална штета од ограничувањата за работа на угостителските објекти, дека е загрозена нивната егзистенција и дека државата ги заборавила, поради што бараат да се опфатени со петтиот пакет антикризни мерки.
„Поради забраните, ги изгубивме сите договорени настани за 2020 година, а овој тренд на откажување ќе продолжи и во 2021 ако пандемијата не се стави под контрола“,
вели претседателот на комората, Миле Спасов.
Ова резултирало или со целосно затворање на дуќани или со ставање во мирување, а вработените се отпуштени.
Имајќи предвид дека голем дел од се микро и мали претпријатија со мал број вработени, еден до пет, па само со отпуштање на еден вработен не ги исполнуваат условите за користење на владините мерки и условите за поволните кредити од Развојната банка.
Комората бара и да и се овозможи да издава лиценци за фото и видеодејноста за да се стави ред во фелата и да се спречи нелојалната конкуренција.
Еден од нивните предлози е при аплицирање за лични документи (пасош, лична карта, возачка дозвола), при пополнување на барањето, да се воведе обврска за доставување и фотографија која ќе се направи исклучиво во лиценцирано фотостудио и на тој начин да се обезбеди некаква егзистенција за нив.