На децата кои беа дел од бадниковите поворки им беа поделени коледарски подароци
Коледари, пеејќи божиќни песни, утрово во пресрет на празникот Божиќ, во бадникови поворки ја најавија убавата вест за Христовото раѓање.
Најголемата бадникова манифестација се одржа во Скопје со празничен концерт на Градскиот плоштад „Македонија” каде што сите деца со нивните семејства беа пречекани со настапите на Антониа Гиговска, Ламбе Алабаковски, Златно славејче, Вера Милошевска, Димитар Андоновски, Стефан (Некст тајм) и Пере (Нокаут).
По концертот се оформи бадникова поворка што преку Камениот мост се упати кон Соборниот храм „Св. Климент Охридски“, каде што сите коледарчиња беа дочекани и дарувани од неговото блаженство, архиепископот охридски и македонски, г.г. Стефан.
Во Аеродром, бадниковата поворка беше пречекана пред општинската зграда каде градоначалникот Тимчо Муцунски на коледарите им подели коледарски подароци.
„Посакувам ваквото одбележување да прерасне во една убава традиција. Заедничка желба на сите нас е Бадник и Божиќ да донесат љубов, мир и разбирање“,
напиша градоначалникот Муцунски на својот инстаграм профил.
Бадникова поворка помина и во Општина Кисела Вода каде градоначалникот Орце Ѓорѓиевски им подели и коледарски пакетчиња на децата кои во огромен број ја пееја ,,Вечниот Бог”.
Пеејќи божиќни песни Бадникова поворка имаше и во Тетово. Стотици деца придружувани од свештени лица и верници поминаа по тетовските улици пеејќи ја „Вечниот Бог“.
Во пресрет на најголемиот православен празник Бадник, МПЦ заедно со свештениците од Кавадарци, организираа традиционална бадникова поворка на која учествуваа над 150 деца учесници придружувани од свештени лица.
Над 120 дечиња кои учествуваа во Бадниковата поворка, исполнувајќи ја Божиќната песна „Вечниот Бог“ продефилираа и низ кочанските улици. Поворката беше примена од градоначалникот на Општина Кочани, Љупчо Папазов, кој им подари коледарски пакетчиња.
Свечени бадникови поворки со стотици деца се организираа и во останатите градови во државата.