Во Скопје, околу 13 часот и 30 минути, почна протестниот марш на семејствата на обвинетите во случајот „Монструм“. Чекорот следува откако во завршните зборови на последното судско рочиште за случајот, Основното јавно обвинителство (ОЈО) побара највиски казни за нив поради петкратното убиство кај Смилковското езеро.
Протестот почна во Чаир, продолжи по улицата „Цветан Димов“ (Бит Пазар) а потоа групата продолжува до плоштадот „Скендер Бег“, од каде преку Стоковната куќа „Мост“ ќе се упати до зградата на Основното јавно обвинителство. Според пријавеното до МВР, се очекува протестот да трае три часа.
Случајот во јавноста познат како „Монструм“ се однесува на петкратното убиство кај Смилковското езеро на 12 април 2012 година. На лице место беа убиени четири момчиња од македонска националност на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски и 45 годишниот Борче Стевковски од селото Црешево. Обдукцијата покажа дека во нив е пукано од три типа огнено оружје.
За убиствата беа обвинети шест лица: Агим Исмаиловиќ, Фејзи Азири, Африм Исмаиловиќ, Алил Демири, Хаки Азири и Сами Љута. Африм Исмаиловиќ и Алил Демири веднаш избегаа на Косово и досега не се екстрадирани. По првото судење, петмина од групата добија доживотна казна затвор, но Врховниот суд ја укина пресудата во 2017 година. Случајот го презеде СЈО и судењето почна од почеток, но и по повторената постапка при која беа земени во предвид и т.н. „бомби“, обвинителката Фатиме Фетаи остана на позицијата дека обвинетите го сториле делото, со исклучок на Сами Љума, за кој кажа дека нема докази. Таа побара доживотен затвор за Алил Демири, Африм и Агим Исмаиловиќ за делото тероризам и максимални казни за Фејзи и Хаки Азири, кои се обвинети за помагање во петкратното убиство кај Смилковско Езеро во 2012 година. Максималните казни што ги посочи таа за двајцата обвинети се 15, односно 9 години затвор.