Ако победи Макрон, тој ќе биде првиот француски претседател кој освоил втор последователен мандат на избори во последните 20 години, откако Жак Ширак го победи таткото на Марин Ле Пен, Жан-Мари, и го освои вториот претседателски мандат во 2002 година. Доколку победи Ле Пен, таа ќе влезе во историјата како првата жена избрана за шеф на државата
Актуелниот претседател на Франција, Емануел Макрон, и неговата противкандидатка, екстремната десничарка Марин Ле Пен, денеска го остварија своето право на глас и гласаа во вториот круг од претседателските избори.
Денеска речиси 49 милиони Французи избираат претседател помеѓу нив двајцата, откако тие освоија најмногу гласови во првиот круг што се одржа пред две недели.
На гласачкото место денеска Макрон дојде во друштво на неговата сопруга, Бриџит Макрон.
Пред избирачкото место тој се задржа повеќе од половина час бидејќи голем број граѓани чекаа да се поздрават и фотографираат со него.
Насмеана, правејќи „селфи“ со поддржувачите, на своето гласачко место денеска се појави и Ле Пен.
Очекувањата во пресрет на вториот круг беа дека Макрон ќе освои нов мандат со оглед дека анкетите му предвидуваа оти ќе собере околу 55 отсто од гласовите, напротив неговата ривалка која би имала околу 10 процентни поени помалку.
Ако победи Макрон, тој ќе биде првиот француски претседател кој освоил втор последователен мандат на избори во последните 20 години, откако Жак Ширак го победи таткото на Марин Ле Пен, Жан-Мари, и го освои вториот претседателски мандат во 2002 година. Доколку победи Ле Пен, таа ќе влезе во историјата како првата жена избрана за шеф на државата.
Инаугурацијата на новиот претседател мора да се одржи до 14 мај, кога завршува сегашниот мандат на Макрон.
Меѓутоа, светската јавност не е рамнодушна во исчекување на исходот од денешните избори, кои Макрон претходно оцени дека тие претставуваат референдум за Европа. Сите очи се вперени кон Франција со оглед дека двајцата кандидати предлагаат две многу различни иднини за Франција – и во внатрешната и во надворешната политика.
Доколку победи Макрон, очекувањата се дека кога станува збор за ЕУ, тој ќе продолжи да го форсира она што тој го нарекува „стратешка автономија“ на Европа во одбраната, технологијата, земјоделството и енергијата со цел да ја намали зависноста на Унијата од други сили.
Се очекува тој да ги задржи и добрите односи на Париз со Берлин, за кои аналитичарите нагласуваат дека ќе бидат клучни за обликување на иднината на Европа.
„Верувам во француско-германската двојка“,
кажа Макрон во една негова изјава.
Ле Пен, пак, во кампањата тврдеше дека нема тајна агенда за Франција да ја напушти Европската Унија, еврозоната или шенген зоната односно да се случи „Фрекзит“. Меѓутоа, нејзините противници веруваат дека нејзината политика во најдобар случај ќе создаде нови тензии во Унијата чие единство изминатите неколку години повеќепати беше тестирано, како на пример, со Брегзитот, пандемијата, мигрантската криза.
Ле Пен најави дека ќе ги намали француските придонеси во буџетот на ЕУ, но и дека ќе преговара за Шенгенскиот договор. Таа ќе се обиде и повторно да го воспостави приматот на француското право над правото на ЕУ што е основата на европската интеграција.
Во однос на НАТО, пак, очекувањата на аналитичарите се дека Макрон ќе се обиде да ги направи Европејците помалку зависни од американската војска за безбедност, но не се очекува дека би ја напуштил Алијансата. Иако тој во 2019 рече дека Алијансата има мозочна смрт, по случувањата во Украина порача дека руската инвазија „го вратила во живот“.
Ле Пен, пак, сака да ја повлече Франција од интегрираната команда на НАТО, а нејзините противници ја обвинуваат дека е премногу блиска со Москва. Нејзината партија доби заем од руска банка за кампањата во 2014 година, а непосредно пред изборите пред пет години кога таа исто така му беше противкандидат на Макрон, имаше и средба со Владимир Путин во Кремљ.
Макрон ја обвини и дека е на неговиот платен список велејќи ѝ: „Кога зборуваш за Русија, зборуваш за твојот банкар“.
Ле Пен, пак, ја осуди руската инвазија на Украина, но според неа, по војната Москва би можела повторно да биде сојузник. Доколу таа победи, како што рече, надворешната политика ќе ја води на еднаква дистанца и од Вашингтон и од Москва.