Одлуката на САД е голем чекор наназад и огромен удар за човековите права на жените и родовата еднаквост, наведе Високата комесарка за човекови права при ОН, Мишел Башелет
Во голем број американски градови вчера и денеска се одржува протести знак на револт од вчерашната одлука на Врховниот суд за поништување на федералното право на абортус, што беше воведено со пресуда стара 50 години.
Тоа значи дека милиони жени во САД ќе го изгубат правото на легален абортус.
Судот ја поништи значајната одлука во случајот „Роу против Вејд“, со што технички беше укинато федералното уставно право на абортус во САД.
Судиите на Врховниот суд кои ја донесоа одлуката наведоа дека пресудата во случајот „Роу против Вејд“ од 1973 година, според која абортусите станаа легални низ САД до моментот кога фетусот може да преживее надвор од матката (помеѓу 24. и 28 недела од бременоста), е погрешна бидејќи Уставот на САД не го споменува правото на абортус.
Речиси половина од американските сојузни државите веќе донесоа или ќе донесат закони за забрана на абортусот, додека други донесоа поригорозни мерки со кои се регулира процедурата и се очекуваат дополнителни ограничувања.
Голем број мерикански спортисти ја осудија одлуката на Врховниот суд. Меѓу првите реагираше и тенисерката Били Џин Кинг, кој пред неколку години во својата биографија откри дека имала абортус и ги опиша проблемите со кои се соочила пред пресудата во случајот „Роу против Вејд“.
Реагираа и членките на американската женска кошаркарска лига (ВНБА), но и кошаркарите од НБА, меѓу кои и ЛеБрон Џејмс.
На одлуката на американскиот Врховен суд претходно реагираше и американскиот претседател Џо Бајден. Тој наведе дека со таквата одлука САД се враќаат 150 години наназад и вети дека ќе направи се што е во негова моќ за да ги заштити правата на жените.
Генералниот секретар на Светската здравствена организација, Тедрос Аданом Гебреисус вчера изјави дека е многу разочаран од одлуката на Врховниот суд на САД за поништување на пресудата со која беше легализиран абортусот во САД.
„Многу сум разочаран бидејќи правата на жените мора да се заштитат. И очекував Америка да ги заштити тие права“,
истакна Гебреисус.
На одлуката реагираа и претставници на Обединети нации.
„Ограничувањето на пристапот до абортусот не ги спречува луѓето да го вршат и „тоа само го прави посмртоносен. Сексуалното и репродуктивното здравје и права се основата на животот по избор, зајакнување и еднаквост за жените и девојчињата ширум светот. Ограничувањето на пристапот до абортус не ги спречува луѓето да бараат абортус, тоа само го прави посмртоносен“,
изјави портпаролот на генералниот секретар на ООН АНтонио Гутереш, Стефан Дујарик.
„Одлуката на САД е голем чекор наназад и огромен удар за човековите права на жените и родовата еднаквост“,
наведе Високата комесарка за човекови права при ОН, Мишел Башелет.