Правото на глас веќе го искористииле и тројцата кандидати: Ковачевски, во Карпош, Деспотовски во Центар и Ременски во Ѓорче Петров
Партискиот статут превидува и втор круг гласање, доколку ниту еден од кандидатите не освои „од прва“ најмалку половина од гласовите на сопартијците
Зоран Заев, кој го предводи СДСМ од 2013 година, денеска во матичната општинска организација на партијата во Струмица, гласаше за еден од тројцата кандидати за негов наследник на лидерското место : Димитар Ковачевски, актуелен заменик-министер за финансии; Фросина Ременски, поранешна потпретседателка на партијата, и Јован Деспотовски, директор на ТИРЗ.
Во СДСМ денеска се одржуваат втори директни избори за лидер на партијата, но први вонредни, поради оставката што Заев ја најави на 31 октомври, по вториот круг од локалните избори. Претходно, лидерот на партијата се избираше на конгрес.
Гласачките места низ општинските организации на партијата се затвораат во 19 часот, по што ќе биде соопштено кој од тројцата кандидати освоил најмногу гласови.
Според информациите од СДСМ, правото на глас веќе го искористииле и тројцата кандидати: Ковачевски, чие избирачко место е во Карпош, Деспотовски во Центар и Ременски во Ѓорче Петров.
Според партискиот статут, можен е и втор круг гласање. За еден од кандидатите да биде избран во првиот круг, треба да освои барем половина (плус еден) од гласовите на сите партиски членови кои учествувале во гласањето. Во спротивно, во вториот круг од гласањето одат двајцата прворангирани кандидати, а победник е тој што ќе освои повеќе гласови.