Студентите, покрај транспарентите со пораки за почитување на Законот за јазиците, во рацете држеа и албански знамиња. Сепак, можеше да се забележи дека се вее и американското знаме. На протестот се истакнати и повеќе транспаренти со политички пораки
„Знаењето нема забранет јазик“; „Не допирајте ја нашата иднина“; „Закон на хартија, дискриминација во практика“ се дел од пораките што беа испишани на транспарентите на студентите на протестот што попладнево се одржа во Скопје, а на кој тие бараат да се овозможи полагање на правосудниот испит на албански јазик.
Протестот почна од плоштадот кај влезот во Старата скопска чаршија, а потоа преку Камениот мост и плоштадот „Македонија“ продолжи пред Министерството за правда.
Студентите, покрај транспарентите со пораки за почитување на Законот за јазиците, во рацете држеа и албански знамиња. Сепак, можеше да се забележи дека се вее и американското знаме.
На протестот се истакнати и повеќе транспаренти со политички пораки.
Протестот се одржа под слоганот „Обединете се со студентите – сите заедно“ и е втор собир организиран од студентите по, како што велат, одбивањето на нивното барање од страна на Министерството за правда.
Организаторите најавија дека ќе продолжат со активностите и притисокот врз институциите сѐ до исполнување на нивното барање.
Премиерот Христијан Мицкоски денеска оствари средба со копретседателите на коалицијата Влен, Биљал Касами и Изет Меџити, каде што главна тема беше изнаоѓањето решение за употребата на јазиците при полагањето на правосудниот испит.
Соговорниците се согласија дека образованието и знаењето се темелите на кои треба да се гради секоја современа држава.
На средбата е заклучено дека институциите веќе активно работат на модел кој ќе биде целосно усогласен со Уставот и со Законот за употреба на јазиците, а насочен кон обезбедување правна сигурност и функционалност на системот.
Средбата доаѓа еден ден откако копретседателите на Влен, Меџити и Касами, на своите фејсбук-профили објавија дека испитот за правосудство наскоро ќе се полага на албански јазик.
Првиот протестен марш се одржа на почетокот на април во Скопје, на кој студентите го изразија своето незадоволство поради неспроведувањето на Законот за употреба на јазиците при полагањето на правосудниот испит.
Тогаш поддршка за студентите дадоа и дел од партиските кадри посочувајќи дека тоа е нивна морална обврска. Негираа дека со нивното присуство даваат политичка заднина на протестот.
Генералниот секретар на Демократската Унија за интеграција (ДУИ), Арбер Адеми, рече дека има чист и јасен закон, но има недостиг на волја, кај Владата, а особено кај министерот за правда Филков, кој, како што додаде, прави злоупотреба на службената положба не почитувајќи го законот.