Шефот на полицијата во Ембакаси изјавил дека меѓу загинатите има и дете, како и дека бројот на жртвите е можно да се зголеми додека траат напорите за расчистување на местото
Најмалку три лица загинале, а речиси 300 се повредени во силна експлозија на гас што доцна синоќа одекнала во главниот град на Кенија, Најроби, јавуваат светските медиуми.
Според официјални владини извори, пренесува Би-би-си, експлодирал камион кој превезувал гас. Инцидентот се случил во областа Ембакаси околу 23:30 часот според локално време, односно 20:30 часот според Гринич.
Како што изјавил портпаролот на кениската влада, експлозијата предизвикала огромна огнена топка оштетувајќи домови, деловни објекти и автомобили.
На видеата објавени на социјалните мрежи може да се види голем пожар како беснее во близина на станбените блокови каде што се случила експлозијата.
BREAKING: Gas station explodes in Nairobi, Kenya. At least 165 injured, rescue work ongoing pic.twitter.com/M9SktooFdF
— BNO News (@BNONews) February 2, 2024
Инаку, претходно кениските власти соопштиле дека експлозијата се случила во фабрика за гас.
Причините за инцидентот сè уште се утврдуваат.
Шефот на полицијата во во Ембакаси, Весли Кимето, изјавил дека меѓу загинатите има и дете, како и дека бројот на жртвите е можно да се зголеми додека траат напорите за расчистување на местото.
Од Црвениот крст на Кенија соопштиле дека во болница се однесени 271 лице, додека на самото место лекарска помош им била дадена на уште 27 луѓе.
Огнената топка од експлозијата се раширила насекаде, рекол владиниот портпарол Исак Мваура Мваура, а една од плинските боци, која излетала од камионот, удрила во складиште за облека и текстил предизвикувајќи пожар.
„Огнот дополнително оштети неколку возила и комерцијални објекти, вклучително и многу мали и средни претпријатија. За жал, беа зафатени и станбени куќи во населбата, во кои голем дел од жителите биле внатре бидејќи беше доцна навечер“,
рекол портпаролот.
Очевидци на експлозијата за локалните медиуми изјавиле дека веднаш по експлозијата почувствувале потрес, а дел од нив мислеле дека станува збор за земјотрес.
Според весникот „Стандард“, кај многу од повредените се констатирани последици од вдишување на чад, а меѓу нив имало и 25 деца.
BREAKING: Gas station explodes in Nairobi, Kenya. At least 165 injured, rescue work ongoing pic.twitter.com/M9SktooFdF
— BNO News (@BNONews) February 2, 2024
„Експлодираше точно пред мене. Ударот ме собори наземи и бев зафатен од пламенот. Имав среќа што некако собрав сили за да се извлечам“,
изјавил за Ројтерс непосреден сведок на експлозијата.
„Мислев дека куќата ќе се урне. На почетокот не ни знаевме што се случува, беше како земјотрес“,
рекол друг за агенцијата АФП.
Новинар на весникот „Нејшн“ кој живее во областа рекол дека сите ги напуштиле своите куќи по експлозијата.
Црвениот крст на Кенија на социјалните мрежи соопшти дека пожарникарите и спасувачките екипи неколку часа неуморно се бореле со пожарите што ги предизвикала експлозијата. Владиниот портпарол рекол дека местото на експлозијата е обезбедено и дека е формиран команден центар за да помогне во координирањето на спасувачките операции.
„На Кенијците им се препорачува да се држат подалеку од областа и да овозможат спроведување на спасувачката мисија со минимални пречки“,
додал портпаролот.