Како прв чекор од најавеното чистење Ивановски вели дека веќе се отстранети речиси сите билборди, светлосни реклами и со години напластуваните информативни постери
Железничката станица во Скопје, која со години беше оставена на работ на функционалноста и хигиената, конечно се чисти и уредува. Директорот на Јавното претпријатие „Македонски железници – инфраструктура“, Синиша Ивановски, информира дека е започната акција за враќање на репрезентативниот изглед на овој објект.
Според Ивановски, децениската институционална и општествена негрижа ја претвориле станицата во нерепрезентативен објект „накитен“ со билборди, нелегални постери, графити и несоодветни содржини и недоволна хигиена.
Како прв чекор од најавеното чистење Ивановски вели дека веќе се отстранети речиси сите билборди, светлосни реклами и со години напластуваните информативни постери.
Ивановски посочува дека еден од комерцијалните субјекти одбил сам да ја отстрани својата реклама.
„Остана уште една светлосна реклама на ‘Хамза донер’, кои одбиваат да ја извадат. Доколку не ја отстранат во рок од седум дена, договорот за закуп ќе им биде раскинат“,
вели директорот на ЈП „Македонски железници – инфраструктура“.
По расчистувањето на рекламниот хаос, екипите на терен ќе продолжат со активности за подигнување на генералната хигиена во внатрешниот и во надворешниот дел на објектот.
Паралелно со чистењето, менаџментот на претпријатието веќе презема чекори за долгорочно решение и модернизација на станицата. За таа цел се воспоставени соработки со клучни научни и образовни институции.
„Во моментов, заедно со Архитектонскиот факултет работиме на проектирање на целосна реконструкција на железничката станица, додека со Институтот за земјотресно инженерство и инженерска сеизмологија (ИЗИИС) ја проверуваме конструкцијата на станицата“,
открива Ивановски.
Од јавното претпријатие признаваат дека процесот на враќање на нормалниот изглед на Железничката станица нема да биде лесен, но нагласуваат дека промените мора да почнат веднаш. За успешната реализација на секојдневните активности на терен, Ивановски изрази благодарност и до полициската станица на МВР, која е лоцирана во склоп на самиот објект.
Инаку, според најавите на министерот за транспорт Александар Николоски, од септември годинава треба да биде пуштена првата линија од проектот „Градски воз“, кој ќе сообраќа од Зелениково преку Драчево, Кисела Вода, Аеродром до Железничката станица Скопје.