Спасувачките екипи цела ноќ беа на терен, нивната акција продолжува и утрово, а според официјалните информации од Противпожарната служба на Грција, заклучно со 6:30 часот, бројот на загинати достигна 32 лица, додека од повредените 85 патници 53 се хоспитализирани
Најмалку 32 лица го загубија животот, а 85 се повредени во железничката несреќа што се случи кусо пред полноќ во близина на месноста Темпи кај грчкиот град Лариса, кога од засега непознати причини се судрија товарен и патнички воз.
Спасувачките екипи цела ноќ беа на терен, нивната акција продолжува и утрово, а според официјалните информации од Противпожарната служба на Грција, заклучно со 6.30 часот, бројот на загинати достигна 32 лица, додека од повредените 85 патници 53 се хоспитализирани.
Причината за несреќата и понатаму е непозната, а како што соопштија од компанијата „Хеленик трејн“, возот со околу 350 патници што сообраќал на релација Атина – Солун директно се судрил со товарен воз.
Од директниот судир, вагоните излетале од шините, по што избил и пожар.
Портпаролот на Противпожарната служба на Грција, Василиос Ватракојанис, утрово соопшти дека акцијата е фокусирана на првите два вагона што се превртени, а се интервенира со помош на четири специјални крана.
Паралелно во тек е и процесот на идентификација на жртвите.