Импровизираниот парламент во организација на „Европски фронт“ е прва активност на коалицијата, откако денеска официјално започна кампањата за парламентарните избори закажани за 8 мај
На денот кога започнува кампањата за парламентарни избори, коалицијата „Европски фронт“ денеска во познат скопски хотел симулираше конститутивна седница, каде што на дневен ред, меѓу другото, се гласаше и за избор на претседател на собрание, имаше инаугурација на шеф на државата, а се изгласаа и уставните измени.
На импровизираната маса која беше налик на онаа од македонското Собрание, на чело седеше лидерот на ДУИ, Али Ахмети, а до него Фатима Османовска од Унијата на Ромите, една од двајцата заменици кои беа „избрани“ на самиот почеток.
Како заменик беше одбран и Бејџан Иљас од Демократската партија на Турците на Македонија (ДПТМ).
Нешто по 11 часот започна импровизираната „седница“, чија прва цел беше констатирање на мнозинството пратеници.
Лидерот на ДУИ, Али Ахмети, во својот говор пред присутните „пратеници“ кажа дека колку граѓаните во државата се полојални, толку таа ќе возврати со иста мера, а земја која не одлучува самоволно за помалите заедници, нема можност да биде рамноправна кон сите поединци.
Во своето излагање, тој се осврна и на кампањата која ќе ја водат во изборите, а како главни постулати на кои ќе се темели кампањата на „Европскиот фронт“ ги спомена гласањето за претседател во Собранието, како и носењето на уставните измени за да се продолжи патот на земјава кон Европската Унија.
„Затоа, едногласно ги поддржуваме уставните измени, исто така поддржуваме по пет години актуелниот претседател да покрене иницијатива за шефот на државата да биде избран во Собранието бидејќи тоа е директен одраз на застапеноста на граѓаните во највисокото законодавно тело, ние сме парламентарна република и мора да се практикува парламентарната демократија, за идниот претседател да биде избран од мнозинството пратеници и по принципот на Бадентер“,
рече Ахмети.
Потоа, тој на гласање ја стави втората точка – која предвидуваше избор на собраниски спикер.
Со релативно големо мнозинство, оваа улога му се додели на лидерот на Алијанса за Албанците, Зијадин Села, носителот на листата за пратеници во петтата изборна единица.
Тој од „претседателската фотелја“ на импровизираната говорница ги повикуваше, еден по еден, коалициските партнери од „Европскиот фронт“ – лидерот на Бошњачкиот демократски сојуз – Мунир Колашинац, Фатима Османовска од Унијата на Ромите, Арјанит Хоџа од Европската демократска партија, Скендер Реџипи од Народното движење и Бејџан Иљас од Демократската партија на Турците на Македонија.
Сите од нив, во своите говори, како и предводникот на „Европскиот фронт“, посочија дека главен фокус на земјава треба да биде носењето на уставните измени за деблокирање на европскиот пат на Македонија.
Откако завршија процедуралните говори на коалициските партнери, „претседателот“ Села, на дневен ред пред 120 членови на фронтот или пратеници го стави гласањето на уставните измени.
„Собранието“ со апсолутно мнозинство од 120 пратеници го усвои предлогот, по што следуваше громогласен аплауз од присутните.
На крајот, претседателскиот кандидат на „Европскиот фронт“, Бујар Османи, беше прогласен за претседател на Република Северна Македонија. Тој во својот „прв свечен говор како шеф на државата“, изрази благодарност на сите партии и граѓани кои му ја дале поддршката на изборите.
„Бев кандидат на сите заедници кои сонуваа за држава на еднакви можности, и мојот избор за претседател е остварување на долгогодишниот сон за рушење на бариерите кои ги ограничуваа луѓето да сонуваат без граници во оваа земја, па затоа сакам да им се заблагодарам на сите за дадената доверба и поддршка“,
рече Османи.
Османи, како и останатите пред него, повтори дека изборот на претседател треба да се прави во Собранието со двотретинско мнозинство, со заеднички консензус од сите политички чинители и етникуми.
Ова Собрание беше конституирано со петтата симфонија на Бетовен – „Ода на радоста“, која воедно официјално се користи во кампањата на Османи за претседател.
Ова беше првиот настан организиран од страна на „Европскиот фронт“ откако денеска започна кампањата за парламентарните избори кои ќе се одржат на 8 мај.