Главен говорник на настанот, кој најманогу го привлече вниманието на медиумите, беше бугарскиот европратеник и копретседател на партијата ВМРО-БНД, Ангел Џамбаски, кој во своето обраќање пред присутните и овој пат не се воздржа од провокативната реторика околу историјата и односите меѓу двете земји
Со препозналива сценографија и реквизити меѓу кои доминираше големо платно со ликот на Мара Бунева, стотина поддржувачи на нејзиниот лик и дело денеска присуствуваа на одбележувањето на 95-годишнината од смртта на револуционерката.
Тие се собраа на Кејот на Вардар во Скопје пред спомен-плочата на Бунева, каде положија цвеќе.
На настанот присуствуваа членови на бугарската Фондација „Македонија“, како и бугарскиот европратеник и копретседател на партијата ВМРО-БНД од Бугарија, Ангел Џамбаски, кои го организираа чествувањето на денот кога е убиена Бунева, кој претходно беше најавен.
Главен говорник на настанот, кој најманогу го привлече вниманието на медиумите, беше токму бугарскиот европратеник.
Тој во своето обраќање пред присутните и овој пат не се воздржа од провокативната реторика околу историјата и односите меѓу двете земји.
Во тој конктекст, Џамбаски во дел од својот говор ги повика „владејачките елити во С Македонија да не ја продолжуваат политиката на геноцид кон Бугарите наложена од Коминтерната“.
„Се собираме на Кејот на Вардар за да и оддадеме почит на големата Бугарка Мара Бунева и да укажеме поддршка на браќата Бугари во Македонија. Тука присуствуваат Бугари од различни делови, организации, но заедно сме да кажеме многу јасно на владејачките србомански политички елити да ги остават македонските Бугари. Да не ја продолжуваат политиката на геноцид кон Бугарите наложена од Коминтерната. Браќа Бугари во Македонија, ние Бугарите од Бугарија сме вашиот грб и потпора, нема да ве оставиме и нема да дозволиме никој да биде српечен како да се чувствува. Нема да дозволиме наметнување на туѓ културно-историски и политички модел на Бугарите во Македонија. Вечна слава на Мара Бунева и вечна слава на сите бугарски херои кои се бореа за ослободување на татковината и нејзино обединување“,
рече Џамбаски во своето обраќање.
Движејќи се кон местото, каде е поставена спомен-плочата на Мара Бунева на Кејот на Вардар во Скопје, со црвено-црвен транспарент со ликот на Иван (Ванчо) Михајло и натпис на истоимениот културен центар, присутните извикуваа „Бугари јунаци“ и „Мизија, Тракија, Македонија“.
Со последниот слоган тие алудираа на трите географски области кои според националистичките бугарски кругови ја сочинуваат „Голема Бугарија“.
На видеото на Фејсбук од ова дефиле, Џамбаски напиша „Еден народ! Две држави!“
Сепак, во интервју за „Слободен печат“, Џамбаски со далеку поблага реторика зборува за односите меѓу двете држави, притоа посочувајќи дека во Македонија има луѓе кои се нарекуваат Македонци и оти, како што вели, ние го почитуваме тоа.
„Не треба да не гледате како противници, ние сакаме да се обединеме, ние сме братски народ. Моите предци се од Битола … Во Македонија има луѓе кои се нарекуваат Македонци. И ние го почитуваме тоа. Ние ќе го браниме нивното право да се нарекуваат како што сакаат. Ние со нив немаме спор. Нашите спорови се на север од Македонија, на запад и на југ. Ние во Македонија и со Македонија немаме спор“,
вели бугарскиот европратеник во интервјуто.
Тој посочува дека поделбата меѓу двете држави ја прави политиката и дека народот во Македонија и во Бугарија не треба да дозволи да надвладее омразата.
„Ние сме активни дејци на вистинската преродба, не на оваа што ја прокламираат сегашните србо-комунисти скриени под името ВМРО. Не треба да дозволиме политиката да ја зголеми тензијата и влоши релацијата меѓу Македонците и Бугарите“,
вели Џамбаски за „Слободен печат“.
Настанот од чествувањето на 95-годишнината од убиството на Мара Бунева денеска помина мирно и без инциденти. Изутрината на Кејот беше забележително зголемено присуство на полицијата.
Мара Бунева е родена во Тетово. Таа на 13 јануари 1928 година извршила атентат врз српскиот државен обвинител Владимир Прелиќ на кејот на реката Вардар. Веднаш по атентот таа самата се застрелала за да не падне жива во рацете на тогашните српски власти. На повредите им подлегнала следниот ден на 14 јануари.
Како и за голем број други историски личности од тој период и за ликот и делото на Мара Бунева постојат различни толкувања и контроверзии меѓу научните кругови во Бугарија и С Македонија.