Мечето само се симнало по интервенцијата на ренџерите од националниот парк „Маврово“, кои ги избркале неколкуте бездомни кучиња кои била собрани околу дрвото и агресивно лаеле по исплашеното животно
Утрово на единствениот број за итни случаи 112 стигнала пријава за заглавено мече во гранките на дрво во двор на викендичка во Маврови Анови, соопшти Центарот управување со кризи (ЦУК).
Пријавата, како што информираат оттаму, била добиена во 7:35 часот, по што Секторот за операции и координација од ЦУК веднаш ги известил Националниот парк „Маврово“ и Министерството за внатрешни работи.
„Ренџерски тим од НП ‘Маврово’ веднаш се упатил кон заглавеното мече, а истовремено со нив пристигнала и патрола на МВР од ПО Маврово заради обезбедување на местото на настанот“,
се вели во информацијата на ЦУК.
Таму биле затекнати неколку бездомни кучиња кои агресивно лаеле по исплашеното мече, кое, како што претпоставуваат од ЦУК, најверојатно од страв се качило на дрвото и се сокрило во гранките.
Откако ренџерите ги избркале кучињата, мечето само се симнало од дрвото и заминало кон блиската шума.
Инаку, вчера од Центарот за управување со кризи информираа дека во вторникот мечка убила и изела неколку овци откако влегла во трло кај селото Равен, Гостиварско.
На видеоснимките што ги испратија од ЦУК, а кои сведочеа за нападот, можеше да се види штетата што ја предизвикала мечката.
Од Центарот за овој случај најавија дека по утврдувањето на состојбите се очекува следни чекори да преземат надлежните министерства, институции, јавни претпријатија и Општина Гостивар.
Мечки и нивни мали во изминатиот период сè почесто, според сведоштвата на жителите, но и информациите кои стигнуваат од ЦУК, можеа да се забележат во населени места, особено во северозападниот дел на земјата.
Во дел од случаите имаше пријави за усмртени мечиња од автомобили додека минувале преку коловози во овој дел на државата, но имаше и такви во кои мечки почнале да напаѓаат домашни животни и се обидувале да влезат во куќи и викендички.
Ловот на мечки во Македонија е трајно забранет. Но, овој вид многу се намножи, особено во националните паркови „Маврово“ и „Шар Планина“.
Минатото лето и есен најалармантно беше во реканското село Жировница.
Годинава беше пријавен случај во кој мечка нападна сточар на планината Мукос, кај месноста „Сеча“, во атарот на селото Оморани во Општината Чашка нанесувајќи му повреди по телото.
Со повреди помина и турист од Данска, кој скијајќи заедно со десетчлена група на необележани патеки кај местото Јелак над Попова Шапка беше нападнат од мечка, која била со своите млади.
Владата донесе мерки меѓу кои беа чистење на дивите депонии за да не ги привлекуваат мечките да се хранат од нив, како и оградување на легалните депонии. На владина седница, исто така, надлежните министерства беа задолжени да изготват план за решавање на проблемот.