Претседателот на Собранието во заминување Талат Џафери денеска ја напушти Клиниката за инфективни болести и фебрилни состојби, каде беше хоспитализиран поради пневмонија и сомнеж за ковид-19 и утре ќе претседава со конститутивната седница на Собранието, потврдија од неговиот кабинет.
„Претседателот Џафери излезе од болница и е во многу добра состојба и утре тој ќе ја води седницата“,
информираат од кабинетот на Џафери.
Претходно и Џафери изјави дека се чувствува добро.
Тој на Инфективна клиника беше сместен од 24 јули, а неколкуте последователни тестови на ковид биле негативни.
Собраниските служби, пак, информираа дека согласно мерките за заштита од коронавирусот конститутивната седница ќе се одржи во големата сала со купола каде што ќе биде обезбедено соодветно растојание меѓу пратениците, собраниските службеници и други лица кои треба да се присутни. Гласовите на оваа седница ќе се бројат рачно, имајќи предвид дека во неа нема инсталирано систем за гласање.
На денот на одржување на Конститутивната седница ќе се мери температура на секој што ќе дојде во собраниската зграда, пратениците и другите поканети гости ќе бидат прифаќани од протоколот и спроведувани точно до местото каде што ќе треба да седат.
Бројот на медиумските работници во Собранието ќе биде ограничен поради здравствените протоколи, а активностите ќе се следат во живо преку Собраниските канал и со стримови во живо.
Конститутивната седница ќе се следи преку Собранискиот канал, а прес-конференции ќе бидат организирани во Кристалната сала каде што би имало доволено простор за одржување дистанца.