Полицаец во индискиот град Ченаи, Рајеш Бабу, на креативен начин се обидува да ја подигне свеста кај населението за коронавирусот, јавува Си-ен-ен.
Имено, тој носи кацига иста како микроскопската слика на коронавирусот, во црвена боја. Носејќи ја неа, Бабу излегува на терен и на контролен пункт ги запира граѓаните со автомобили и мотоцикли и им укажува на неопходноста од социјалното растојание и носењето на заштитна лична опрема.
Кацигата ја изработил локален уметник откако увидел дека луѓето не ја сфаќаат сериозно болеста и недостасува јавната свест за пандемијата и за почитувањето на превентивните мерки. Затоа се решил да создаде нешто со што на граѓаните ќе им покаже како вирусот доаѓа кон нив и така ќе бидат исплашени.
Бидејќи продавниците се затворени, локалниот уметник импровизирал и ја направил кацигата од хартија. Откако ја направил, заминал во најблиската полициска станица каде што полицаецот Бабу со задоволство ја прифатил неговата идеја.