Претседателот Пендаровски ја реафирмирал подготвеноста на државата да даде свој активен придонес во напорите на Алијансата насочени кон исполнување на стратегиските цели, во одржувањето на регионалната безбедност и зацврстување на единството во НАТО
Шефот на државата Стево Пендаровски, денеска во градот Монс во Белгија ја посети Врховната команда на сојузничките сили за Европа на НАТО и оствари средба со Врховниот командант, генерал Кристофер Каволи, информира неговиот кабинет.
Пендаровски за време на средбата бил запознаен со тековните активности на командата и зајакнувањето и приспособување на силите по почетокот на руската воена инвазија на Украина, во насока на заштита на НАТО сојузниците и намалување на ризикот од проширување на конфликтот.
„Претседателот Пендаровски ја реафирмираше подготвеноста на државата да даде свој активен придонес во напорите на Алијансата насочени кон исполнување на стратешките цели, во одржувањето на регионалната безбедност и зацврстување на единството во НАТО. Претседателот Пендаровски истакна дека Република Северна Македонија, во рамки на своите капацитети, ќе продолжи да дава воена, хуманитарна и дипломатска помош на Украина, со крајна цел прекин на воената агресија, одбрана на демократските вредности и воспоставување на мир“,
соопшти неговиот кабинет.
Генералот Каволи се заблагодарил за севкупната поддршка што Северна Македонија како членка на НАТО ја дава во напорите на Алијансата за одржување на безбедноста на евроатлантскиот простор.
Кабинетот на претседателот информира дека во рамки на посетата тој остварил средба со припадници на Армијата на Северна Македонија распоредени во Врховната команда на сојузничките сили за Европа.