Според информациите на српското МВР, бомбата од 1999 година е тешка 1 000 килограми и има 430 килограми експлозивно полнење
Повеќе од илјада жители на Ниш, најголемиот град во јужна Србија, денеска беа евакуирани поради дислокација на авиобомба од градилиште во населбата Стеван Синѓелиќ, која останала од бомбардирањето на НАТО пред 25 години, пренесуваат српските медиуми. Бомбата била откриена минатата недела додека биле извршувани градежни активности во Научно-технолошкиот парк во Ниш.
Ова денеска го соопшти српското Министерство за внатрешни работи, посочувајќи дека бомбата е безбедно неутрализирана и отстранета од градилиштето во населбата Стеван Синѓелиќ во Ниш.
„Бомбата е транспортирана до безбедна локација каде што ќе биде уништена“,
се вели во соопштението на МВР Србија.
Бомбата била отстранета од градилиштето и со камион била транспортирана со помош на полицијата, противпожарните екипи, а на местото превентивно имало и медицински тим.
Според информациите на српското МВР, бомбата од 1999 година е тешка 1 000 килограми и има 430 килограми експлозивно полнење.
„Се работи за една од најголемите бомби пронајдени на територијата на Србија“,
рекоа од српската полиција.
НАТО-бомбардирањето на Сојузна Република Југославија траеше од 24 март до 10 јуни 1999 година.
Според податоците на Меѓународниот комитет на Црвениот крст, како што пренесуваат српските медиуми, авионите на НАТО за 78 дена извршиле 38 400 летови, а биле пуштени 23 614 парчиња воздушна муниција.
Градот Ниш во текот на бомбардирањето неколку пати бил цел на напади.