Екипата на „Медена земја“ е подготовена за церемонијата на Оскарите. Тоа е заклучокот од заедничката фотографија која предмалку ја сподели еден од кинематограферите на документарниот филм Фејми Даут.
На фотографијата, од лево на десно се: Тамара Котевска, Атанас Георгиев, Љубо Стефанов, Атиџе Муратова, Самир Љума, Рена Еид, Благоја Неделковски и Фејми Даут.
Помеѓу полноќ и два часот наутро по македонско време, екипата на „Медена земја“ јавноста ќе ја види на црвениот тепих пред театарот „Долби“ во Лос Анџелес. Нивното дело веќе е најнаградуван македонски документарен филм.
Приказната е за последната одгледувачка на диви пчели во Европа, Атиџе Муратова, која се соочува со предизвици откако во нејзиниот крај пристигнуваат пчелари номади кои го прекршуваат основното правило: земи половина од медот, а другата половина остави им ја на пчелите.
Филмот е сниман во речиси недопрената дивина на Овчеполието, во и околу селото Бекирлија, општина Лозово.
*поврзана вест: Од Бекирлија до Холивуд – како се снимаше „Медена земја“