Семејството ме покани во нивниот дом за да го запознаам ова девојче кое денеска полни 1 година. Голема да растеш Лара, здрава, безгрижна, храбра и секогаш насмеана. Благородноста и хуманоста наследи ги од твоето семејството кое остави вечен белег во историјата на македонското здравство, напиша Филипче на Фејсбук
Министерот за здравство Венко Филипче вечерва на својот Фејсбук профил објави фотографии од првиот роденден на ќерката на Јасмина Василковска, жената чие семејство ги донираше нејзините органи кои спасија три човечки животи.
„Среќен роденден Лара. Денеска ја запознав ќерката на Јасмина Василковска, жената донор на срце и бубрези, која неодамна спаси три човечки животи. Семејството ме покани во нивниот дом за да го запознаам ова девојче кое денеска полни 1 година. Голема да растеш Лара, здрава, безгрижна, храбра и секогаш насмеана. Благородноста и хуманоста наследи ги од твоето семејството кое остави вечен белег во историјата на македонското здравство“,
напиша тој на Фејсбук.
По констатираната мозочна смрт, семејството на Јасмина одлучи да ги донира органите. Нејзиното срце почна да чука во градите на 39-годишна жена која според последните информации е во добра состојба.
На 44-годишен маж и 30-годишна жена, пак, им беа трансплантирани бубрезите и тие се во добра состојба.