Активистите велат оти нема да прифатат убивањето на бездомните животни да стане новата реалност
„Нивната болка, наша борба. Нивните солзи, наш глас“, „Планираат ли властите да го решат проблемот со кучињата од улиците“, „Затвор за убиците“, „Биди човек, не монструм“, „Стоп за слободна продажба на отров“, „И кучињата си одат од државата поради вашата неспособност“ беа само дел од транспарентите што можеше да се прочитаат на денешниот протест пред зградата на Владата, а на кој својот револт го искажаа активитите за заштита на правата на животните. Тие денеска, заедно со своите миленици, се собраа на „Илинденска“ б.б. бесни поради неодамнешните случувања во Струга каде според Здружението „Анима мунди“ во два дена се убиени дваесетина кучиња скитници.
Активистите со свирчиња и црвена боја како симбол за сите невини убиени животни, упатија јасна порака до институциите – дека конечно треба да работат во интерес на заштита на животните, но и на луѓето.
„Решението на проблемот е во отворање на ветените државни шелтери за вдомување на бездомните кучиња, да се воведе задолжителното микрочипирање на милениците, како и задолжителната стерилизација односно кастрација на милениците, која за помалку од три години би го решила проблемот со кучињата скитници“,
рекоа активистите на протестот.
Активистите велат оти нема да прифатат убивањето на бездомните животни да стане новата реалност.
Денеска премиерот Димитар Ковачевски кажа дека му дал налог на министерот за земјоделие Љупчо Николовски да се подготви нов закон за миленици. Вчера, пак, коментирајќи ги проблемите со бездомните кучиња кои се актуализирани во последните денови по убиството на десетина кучиња во Струга, премерот најави дека иако овој проблем не е во надлежност на државата ќе се побара помош од Брисел преку ИПАРД-програмите да биде изграден стационар во кој ќе се згрижуваат кучињата скитници.
Протестот на активистите за заштита на правата на животните следува откако здружението „Анима мунди“ во понеделникот соопшти дека во Струга се убиени десетици маалски бездомни кучиња.
По објавата на „Анима мунди“, на службен полициски разговор беше повикан 62-годишник со иницијали М.З. од струшкото село Ливада кој е осомничен дека на 10 јануари во рок од половина час (од 6:45 до 7:15 часот) со својата пушка усмртил седум кучиња скитници.