12 загинати и десетици повредени е епилогот од автобуската несреќа која се случи рано утринава, кога автобус со полски регистарски таблички, од засега непознати причини, излетал од автопатот А4 и паднал во канал кај Брезнички Хум во правец кон главниот град на Хрватска, Загреб. На лице место настрадале 11 луѓе, а едно лице починало подоцна поради последици од тешки повреди.
Според првичните информации кои ги соопшти потпретседателот на Владата и министер за внатрешни работи на Хрватска, Давор Божиновиќ, на прес-конференција, информацијата за несреќата пристигнала од полска државјанка која била во автобусот, по што биле ангажирани сите надлежни служби кои, според него, реагирале навремено. Во автобусот, како што кажа се превезувале 43 патници, но и дека се уште се чека целосната листа на патници. Божиновиќ додаде дека автобусот превезувал аџии во католичкото светилиште на Богородица во Меѓугорје, Босна и Херцеговина кои неофицијално тргнале од полскиот град Томашув Мазовјецки.
Инаку, иако засега нема официјални информации која е причината за несреќата, според неофицијални информации, најверојатно, возачот заспал при управувањето со возилото.
„Во несреќата загинале поголем број на лица кои биле тешко повредени. На местото на настанот заедно со полициските службеници од Вараждин и Загреб се ангажирани повеќе екипи од заводот за Итна медицинска помош од подрачјето на Вараждин, но и Загреб, како и пожарникари од двете жупании“,
соопштија од хрватската полиција.
Полскиот премиер Матеуш Моравјецки по несреќата, во Хрватска ги испрати министерот за здравство Адам Војчех Ниеџиелски и заменик министерот за надворешни работи Марчин Пжидач, а со нив патуваат и медицински лица и психолози.
Портпаролот на полското МНР пак изјави дека според информациите поголемиот дел од повредените се деца.
„Не знаеме како се случила сообраќајната несреќа, ни колку точно патници имало во автобусот. Како што јавуваат хрватските медиуми поголемиот дел од повредените се деца. Повреди од различен степен здобиле 34 лица. Сите жртви се Полјаци“,
истакна портпаролот на полското Министерство за надворешни работи, Лукаш Јасина.
Хрватскиот премиер Андреј Пленковиќ и министерот за надворешни работи Гордан Грлиќ Радман разговараа со своите полски колеги и во името на хрватската Влада изразија сочувство до семејствата на загинатите.